Гадаадад бензин уснаас ч хямдрах нь, харин манайд?

Дэлхийн өнөөгийн нөхцөл байдлын улмаас нефтийн үнэ улам буурсаар байна. III сард нийлүүлэгдэх Brent маркийн нефть 1 баррель нь 28,25 доллар болж, 0,86%-иар буурсан бол WTI маркийнх 30,39 доллар болжээ (сүүлийн 7 хоногт). Иранд тавьсан хоригийг цуцалсны дараа Лондоны “ICE” бирж дээр III сард нийлүүлэгдэх Brent маркийн нефть нэг баррель нь $27,96 хүртэл буурсан. Тиймээс бензиний үнэ уух уснаас маань ч хямд болж магадгүй хэмээн гадаад орнуудад шуугиж эхлэв.

“Нэг баррель нефтийн үнэ буурсаар байгаа тул одоо бид нефть эсвэл хий дамжуулах хоолой барихаа больж, ус зөөвөрлөх труба босговол дээр” гэж Оросын зарим хэвлэл мэдээллийн хэрэгслэлээр ярьж байна. Тэгээд ч Орос усны нөөцөөр дэлхийд тэргүүлдэг хойно, 3 далай, 12 тэнгис болон 2,5 сая гаруй гол мөрөн, 2 сая нууртай улс даа.

Энэ талаар интернэт тэр чигтээ шуугин, хэрэглэгчид санал бодлоо солилцож байна. “Манай аварга том корпорациудын ярьснаар нефтийн үнэ 15 доллар байхад л Оросын компаниудын хувьд боломжийн гэх юм. Өөрөөр хэлбэл, 15 доллар байсан ч тэд ашигтай орлоготой ажилладаг. Тэгэхдээ энэ 15 долларт нь бүх татвар, тээвэрлэлтийн хөлс багтдаг гээд төсөөл дөө. Үүнээс үнэ жаахан буурсан ч боловсруулалтаасаа нөхчихнө” хэмээн Оросын блогч Ehlvira Borschenko-Tarasenko бичжээ.

Арай ч дээ, санаанд багтамгүй юмаа. Гэтэл энэ оросууд 1 баррель нефтиэ манайд хэдээр зардаг билээ? Хөрш орон болохоор Оросоос бензин шатахуун тээвэрлэхэд нэг их мөнгө гармааргүй юмаа. Тэгээд ч татварын хувьд манайх хөнгөлөлт үзүүлдэг шиг санаж байна, ямар ч гэсэн Монголын бөөнийхөндөө?

Оросын өөр нэг блогч Сергей Гудман “Би өөрсдийнхөндөө нэг их санаа зовохгүй байна. Тэд ашгаа ард түмнээс, биднээс нөхчихнө. Бензин 100 рубль байсан ч тэд шоколадандаа хөлбөрсөөр байх болно” хэмээжээ. Итгэмээргүй байгаа биз?

Гадаадад бензин уснаас ч хямд болох сурагтай, гэтэл манайд?

М.Цогзолмаа, www.mnews.mn