Таван хувийг хүүхдийн тоотой уявал хол явахгүй ээ

Дээрээс нь урьдчилгаа төлбөрийг хөнгөлөх, буцалтгүй тусламж маягаар олгох журмууд ч гарч ирэх сураг байсан. Цагаан сарын өмнө чухам ямар журам гарч, иргэдийг гялайлгахыг харж л суухаас. Ямар ч байсан ипотекийн зээл үргэлжилж, хүү нь буурч байвал ард иргэдэд хэрэгтэй. Амьдрал ахуйгаа босгож, орох оронтой болохоор зүтгэж байгаа залууст ч аятай юу. Харин шинэ гарах журамд ганц нэг сонирхолтой заалт орох сураг гараад байгаа. Тухайлбал, ипртекийн зээлийн хүүг хүүхдийн тоотой уях гээд байгаа бололтой. Цаад санаа нь хүн амын өсөлтөө дэмжих зорилготой юм уу даа.

Тодорхой хэлбэл, нэг хүүхэдтэй бол 8 хувийн зээл авна. Хоёр бол 7, гуравтай болчихвол 6, дөрвөн хүүхэдтэй бол 5 хувийн зээлэнд хамрагдах боломжтой болох аж. Засгийн газраас гарах журамд ийм заалт оруулахаар хэлэлцэж байгаа бололтой юм. Яг ингээд журамлана гэвэл бүтэхгүй ээ. Яахав, хүн амын өсөлтийг дэмжих гэсэн санаа нь зөв. Харин ипотекийн зээлтэй уяж өгнө гэвэл хол явахгүй ээ. Хэн ч энэ журмыг давж гарахгүй. Өнөөдөр 25-35 насны залуучууд орон сууц авахаар зүтгэж байгаа. Эрэлт энэ насныханд их байна гэсэн үг.  Дээрээс нь энэ хэрийн насны залуус дунджаар 1-2 хүүхэдтэй л байгаа.  Орон сууцаа аваад, зээлээ төлөөд, завсраар нь үр хүүхдээ гаргаад явахад 2-оос илүүг гаргах боломж жаахан хомс гэсэн үг.

Хэрвээ 4 хүүхэдтэй болоод, 5 хувийн зээл авна гэж зүтгэвэл хэзээ ч орон сууцтай болохгүй. Түүний орон 8 хувийн зээлээ авсан нь дээр. Залуу хос 23 настайдаа гэр бүл боллоо гэж бодъё. Дундаж нас шүү. Түүнээс хойш гэр бүлээ төлөвлөөд, 2 жилийн зайтай дөрвөн хүүхэд төрүүлсэн байг. Энэ хугацаанд эхнэр нь ажил хийхгүй. Ганц хүний цалингаар гэр бүлээ тэжээнэ. Тэгээд дөрвөн хүүхдийн хувцас хунар, хоол унд бэлтгэнэ гэвэл хэдийд нь урьдчилгаа цуглуулах билээ. Хамгийн хямдхан байрны 10 хувийн урьдчилгааг ч цуглуулж амжихгүй. Ёстой үлгэрийн далай.  За яахав, гялс дөрвөн хүүхэд төрүүлчихээд 5 хувийн урьдчилгаанд хамрагдахаар зүтгэе гэж санъя. 23 настайгаасаа авахуулаад хоёр жилийн зайтай дөрвөн хүүхэд төрүүлсэн эхнэр 32-тойдоо ажил хийх боломжтой болно. Хүүхдүүдээ сургууль, цэцэрлэгт асуудалгүй оруулчихвал шүү дээ.

Ингээд хоёр зэрэг зүтгээд, 1-2 жилийн хугацаанд 10 хувиа цуглуулъя. Ингэснээр байтал 35 нас хүрнэ. Тэр үед нь өнөөх 5 хувийн зээл нь яах ч юм билээ. Ердөө энэ журмын болзлыг биелүүлэх гэж хамаг залуу насаа бараад, сүүлдээ банкны шалгуураар нас заагдаад хасагдах л сонголт үлдэх гээд байна. Ийм балай журам оруулах гэж байгаа бол хөрсөн дээрээ буу гэж хэлье, дарга нар минь. Ипотекийн зээлээ зүгээр л үргэлжлүүлэхээ бод. Харин тэр хүн амын өсөлтийг дэмжих бодлогоо арай өөр маягаар хийнэ биз. Залуучууд орон байрныхаа асуудлыг шийдчихвэл тэртээ тэргүй үр хүүхдээ төрүүлээд, амьдрал ахуйгаа аваад явчихна. Түүнээс биш 5 хувийн зээлэнд орно гээд 4 хүүхэд төрүүлэх гээд зүтгэж байдаг тэнэг хүн ч гэж хаа байхав. Зүгээр л хэдэн жил зарцуулж байж тэр боломжид хүрэхийг хальт дурьдахад ийм л байна шүү дээ.

Н.Болд