Н.Энхбаярыг Шадар сайд болгохын тулд Гацууртын ордыг гацааж эхлэв үү

Ийнхүү УИХ-д суудалтай намуудын төлөөлөл завсарлага нэрээр ажил хаяж, олон ажил цалгардахад хүрээд байна. Тэгвэл завсарлага авна гэдэг нь нэг талаараа ажил хаях хэдий ч нөгөө талдаа ямар нэгэн тохироо хийхээр сэм тохиролцож байдаг нь нууц биш. Тийм ч учраас “Шударга ёс” эвсэл завсарлага авч, Гацууртын ордын төслийг гацаасан нь цаанаа учиртай гэх таамаг ч байна. Тодруулбал, МАХН-аас Н.Энхбаярыг Шадар сайд болгохын тулд Гацууртын ордыг гацааж, шантаажилж байна гэх яриа ч байгаа юм.

Учир нь Н.Энхбаярыг шадар сайд болгох тухай асуудлыг УИХ-ын гишүүн, БХБ-ын сайд УИХ дахь “Шударга ёс” бүлгийн дэд дарга З.Баянсэлэнгэ албан ёсоор Ерөнхий сайд Ч.Сайханбилэгт хүргээд байгаа билээ. Тэрбээр Ерөнхий сайд Ч.Сайханбилэгт илгээсэн албан бичигтээ “Монгол Улсын Шадар сайд, Эрүүл мэнд, спортын сайдын суудалд МАХН-аас нэр дэвшүүлж байхаар эвсэл дотроо тохиролцсон. Мөн Ц.Оюунбаатар Шадар сайдын албан тушаалаасаа чөлөөлөгдөх саналаа холбогдох хуулийн дагуу гаргасан байна. Тиймээс МАХН-аас Н.Энхбаярыг Шадар сайд, Ц.Оюунбаатарыг Эрүүл мэнд, спортын сайдын албанд томилуулах хүсэлт ирсэн тул Ерөнхий сайд танд уламжилж байна” хэмээн дурдсан байдаг.

Харин энэ асуудалд Ерөнхий сайд Ч.Сайханбилэг байр сууриа илэрхийлээгүй байгаа билээ. Хэрвээ тэрбээр энэ асуудлыг зөвшөөрвөл Ерөнхийлөгчид зөвшилцөх хүсэлтээ явуулах учиртай. Ямартай ч Н.Энхбаяр Шадар сайд болох эсэх нь Ерөнхийлөгчийн хариултаас шалтгаалахаар болчихоод байгаа юм. Тиймээс л МАХН-аас энэ асуудлыг нэн даруй шийдвэрлүүлэхийн тулд Гацууртын ордоор завсарлага авч, шантаажилж байхыг үгүйсгэхгүй.