М.Цэрэнчимэд: Монгол улсын аварга Д.Хадбаатар танаа

Сэтгэл цагаахан орчлонд
Итгэл тунгалаг алхсан
Бодол цайлган хорвоод
Мөрөөдөл дүүрэн инээсэн
Бяр чадлын гайхамшигаар
Босоо оршсон хүчтэн
Буян заяагаа хайрласан
Бөхийн хүндлэл аваргаа
Уулсын нуруу шиг
Уужимхан сэтгэл таных
Ургаа хад шиг
Уудам галбир , төрх таных
Төрийн наадмын дэвжээг
Түрүүгээр мялаасан аваргаа
Төгөлдөр монголын шороонд
Тоглож инээлдсэн эгэл сэтгэл
Андын нандин итгэлийг
Андгайлан илүүчлэн дээдэлдэг
Аавын хүндэт сургаалыг
Амьдралдаа өвлөн үлгэрлэсэн
Угтаалын уудам нутгийг
Улс монголоор дуудуулсан
Уяхан сэтгэлийн итгэлээр
Ургаж мандсан дулаан наран