Ө.Энхтүвшин: С.Эрдэнийг намын дарга нь их хайрладаг гэсэн

2016 оны төсвийг хэлэлцэх үеэр УИХ-ын гишүүн Ө.Энхтүвшин Хүн амын хөгжил нийгмийн хамгааллын сайд С.Эрдэнийг багагүй шүүмжиллээ.

Тэрээр “С.Эрдэнэ сайд гуай 2016 онд нийгмийн даатгалын сангаас өөрөөр хэлбэл тэтгэвэр, тэтгэмжийн сангаас 30 тэрбум төгрөг зарцуулж хашаа, хайс, хаалга барих юм гэнэ. Эрхэм сайд эрх мэдлээ ашиглаж, төсөвт ингэж бусармагаар “шургуулах”-аа болих хэрэгтэй. Энэ их эрх мэдлээ болих хэрэгтэй шүү дээ. С.Эрдэнэ сайдад  намын дарга нь их хайртай юм гэсэн. Ямар хайр гэхээрээ нэг суманд хоёр ордон бариулахыг зөвшөөрдөг хайр вэ” гэсэн юм.

Энэхүү шүүмжлэлд УИХ-ын гишүүн Д.Ганхуяг “С.Эрдэнэ сайдын оруулсан энэхүү асуудал 2015 онд баригдаж эхлээд дуусаагүй байгаа бүтээн байгуулалт. Дээрх мөнгө нь дандаа засвар хийх зардал юм” гэж хариуллаа.

Д.ЖАРГАЛ