Монголд зүрхны дутагдлыг эмчлэх шинэ аргыг нэвтрүүллээ

Улсын гуравдугаар эмнэлэгийн зүрх судасны тасгын хамт олон Монгол улсад анх удаа Зүрхний архаг дутагдлын үеийн орчин үеийн эмчилгээний арга болох Ресинхронизаци (Cardiac Resynchronization Therapy: CRT) эмчилгээний төхөөрөмж суулгах мэс ажилбарыг амжилттай гүйцэтгэж, өөрсдийн тусламж үйлчилгээндээ нэвтрүүллээ.

Зүрхний ресинхронизаци эмчилгээ нь зүрхний булчингийн эмгэгийн (кардиомиопати) улмаас үүсэх зүрхний дутагдалтай өвчтөнд ихэвчлэн хийгддэг, эмнэлзүйн олон туршилт судалгаагаар аюул эрсдэл багатай, үр дүн сайтай, өвчтөнд эмнэлзүйн мэдэгдэхүйц сайжралыг өгдөг болох нь нотлогдсон, эмнэлзүйн практикт тогтмол хэрэглээ нь эрс нэмэгдэж байгаа эмчилгээний нэг арга юм.

Зүрхний ресинхронизаци эмчилгээ нь зүрхний дундаас хүнд зэргийн дутагдалтай, ховдлын үйл ажиллагааны синхрон бус байдал илэрсэн өвчтөнүүдэд эмчилгээний шинэ нэмэлт сонголт болон нэвтэрснээрээ онцлогтой ажээ.

Н.Буянжаргал