Онгоц осолдож 224 хүн амь үрэгдэв
Египетээс Санкт-Петербург хот руу жуулчдыг тээвэрлэж явсан Оросын онгоц өнгөрсөн сарын 31-нд Синайн хойгт осолдов. Ослын улмаас 217 зорчигч болон нисэх багийн долоон гишүүн бүгд амь үрэгджээ. ОХУ-ын “Когалымавиа” агаарын тээврийн компанид харьяалагддаг “Аirbus-321” зорчигч тээврийн онгоц Шарм-эль-Шейх хотын нисэх буудлаас хөөрөөд 23 минутын дараа холбоо тасарчээ. Улмаар уг онгоц Синайн хойгт унасан талаар мэдээлэл тархсан байна.
Эмгэнэлт үйл явдалтай холбогдуулан арваннэгдүгээр сарын 1-нийг Орост гашуудлын өдөр болгон зарлав. Оросын зорчигч тээврийн онгоц Синай хойгт сүйрсэнтэй холбогдуулан ОХУ-ын Ерөнхийлөгч Владимир Путин арваннэгдүгээр сарын 1-ний өдрийг гашуудлын өдөр болгон зарлах тухай зарлигт гарын үсгээ зуржээ. Өчигдөр Орос даяар төрийн далбааг буулган зугаа цэнгээний бүхий л үйл ажиллагааг зогсоосон байна. Ерөнхийлөгч Засгийн газарт амь үрэгдэгсдийн ар гэрт туслах арга хэмжээ авах үүрэг өглөө. Мөн тэрээр амь үрэгдэгсдийн ар гэр, төрөл саданд эмгэнэл илэрхийлж, комисс байгуулан Онцгой байдлын яамны аврах ажиллагааны онгоцуудыг Египетэд илгээх үүрэг өгсөн байна.
Осол болсон газарт Египетийн онцгой албаныхан очиж аврах ажиллагааг эхлүүлжээ. Мөн Египетийн Ерөнхий сайд Исмаил Шериф өөрийн биеэр очсон байна. Онгоц унасан газраас 150 гаруй хүний цогцос олдоод байгаа гэнэ. “Онгоц хоёр хэсэг тасран унасан ба сэг дотор байсан зуугаад хүний цогцсыг бид гарган аваад байна” гэж Египетийн аврах албаны төлөөлөгч хэлжээ. Мөн ослын газраас онгоцны хар хайрцгуудыг олжээ.
Египетийн Шарм-эль-Шейх хотоос ОХУ-ын Санкт-Петербург хотын чиглэлээр нислэг үйлдэж байсан “Когалымавиа” компанийн “Аirbus-321” онгоц Москвагийн цагаар өглөөний 06:51-т тэндээс хөөрч 07:14 цагт холбоо тасарсан байна. Удалгүй радарын дэлгэцнээс алга болжээ. Агаарын хөлөг Хойд Синайн Эль-Ариш хотоос өмнө зүгт унасан аж. Ослын шалтгаан нь техникийн асуудал байж магадгүй. Багийнхан долоо хоногийн дотор хэд хэдэн удаа энэ талаар удирдлагадаа сануулж байжээ. Нисэхийн компани цөөн агаарын хөлөгтэй учир эдгээр онгоцнууд Египетэд тасралтгүй нийслэг хийж байжээ.
Осолдсон онгоц нь 1997 онд үйлдвэрлэгдсэн байна. Голландын “Aer Cap” (1563 онгоцтой) лизингийн компанийн хөрөнгө бөгөөд Ирландын EI-ETJ бүртгэлтэй, Оросын “Когалымавиа” компани 2012 оноос ашиглаж иржээ. Үүнээс өмнө уг онгоцыг Туркийн “Onur Air” ба Саудын Арабын нисэхийн компаниуд ашиглаж байжээ.
ОНГОЦЫГ ТЕРРОРИСТУУД СӨНӨӨСӨН ҮҮ?
Синайн хойгт онгоц осолдож, 224 хүн амь үрэгдсэн хэрэгт “Исламын улс” бүлэглэлийг хардаж байна. Учир нь “Исламын улс” бүлэглэлтэй холбоотой Египет дэх зэвсэгт бүлэглэл цахим ертөнцөөр Оросын онгоцыг буудаж унагасан хэмээн мэдээлжээ. ОХУ нь өнгөрсөн есдүгээр сараас эхлэн Сири дэх “Исламын улс” бүлэглэлийн байршлуудад агаарын цохилт өгч эхэлсэн билээ. Харин Египетийн Ерөнхий сайд онгоцны осол техникийн шалтгаантай байх магадлал өндөр хэмээсэн аж. Өмнө нь Оросын онгоц техникийн шалтгаанаар ослын буулт хийх хүсэлт тавьсан хэмээн хэвлэлүүдэд мэдээлж байсан юм. Онгоцны хоёр хар хайрцгийг олсон тул ослын шалтгаан юу байсныг тогтоох нь цаг хугацааны асуудал болоод байна. Онгоцны ослын шалтгааныг тодруулахаар ОХУ, Францын мөрдөн шалгах албаныхан Египетийн тал болон “Airbus” компанийн төлөөлөгчдийн хамт ажиллаж байгаа аж.
Түүнчлэн “Когалымавиа” компанийг нислэгийн дүрэм зөрчсөн болон бэлтгэлийг муу хангасан зэрэг хэрэгт сэжиглэж байгааг Риа-Новости мэдээлжээ. Харин “Когалымавиа” компанийн зүгээс сүйрсэн онгоц 18 жил ямар ч асуудалгүй нислэг үйлдсэн бөгөөд нисгэгч нь 12 мянган цагийн туршлагатай гэж мэдэгджээ.
ТОМООХОН КОМПАНИУД НИСЛЭГЭЭ ТҮР ЗОГСООЖЭЭ
Оросын онгоцны ослын шалтгааныг тодруулах хүртэл “Emirates”, “Air France”, “Lufthansa” зэрэг томоохон авиа компаниуд Синайн хойгийн дээгүүрх нислэгээ түр зогсоосон байна. Өнгөрсөн бямба гаригт “Исламын улс” бүлэглэлийн хэт даврагчид Синайн хойгт унасан ОХУ-ын онгоцны ослын хариуцлагыг өөрсдөө хүлээх тухай мэдэгдсэний дараа авиа компаниуд дээрх шийдвэрийг гаргажээ. Синайн хойгоор “Lufthansa” компани л гэхэд өдөрт 10 гаруй нислэг хийдэг юм байна. Тиймээс аюулгүй байдлыг хангах зорилгоор ослын шалтгааныг тодруулах хүртэл нислэгээ түр зогсоохоор болжээ.
М.Хүслэн
Эх сурвалж: “Зууны мэдээ” сонин
URL:
