Онгоц үзэгчдийн дээр унажээ

АНУ-ын Невада мужийн Рено хотод өнгөрсөн бямба гаригт болсон Үндэсний онгоцны спортын аварга шалгаруулах тэмцээний үеэр дэлхийн II дайны үед ашиглагдаж байсан “Мустанг Р-51″ онгоц үзэгчдийн асарын ойролцоо сүйрчээ.

Үүний улмаас есөн хүн амиа алдаж, 60 орчим хүн бэртсэн гэж “АР” агентлаг мэдээлсэн байна. Амиа алдагсдын зургаа нь эмнэлэгт хүргэгдээд амьсгал хураажээ.

Шинжээчдийн үзэж буйгаар сөнөөгч онгоц тэмцээний үеэр хүнд элемент гүйцэтгэх үедээ жолоодлогын алдаа гаргаснаар сүйрсэн аж. Үндэсний онгоцны спортын холбооны спикер Марк Розенкинд “Гэрэл зураг, дүрс бичлэгээс харахад онгоцны сүйрлийн шалтгааныг олоход хялбар” гэжээ.

Одоогийн байдлаар 69 хүн эмнэлэгт хүргэгдсэн байна. Эдгээрийн наймынх нь биеийн байдал тун хүнд байгаа гэж эмнэлгийн ажилтнууд мэдэгджээ.