Огноо: 2015/8/31 18:08:39

ЖДҮ-ийн нэрийн бүтээгдэхүүн тодорлоо

Монголд анх удаа ЖДҮ эрхлэгчдийн “Үндэсний нэрийн бүтээгдэхүүн” шалгаруулах үзэсгэлэн худалдааг Аж үйлдвэрийн яам амжилттай зохион байгууллаа.

Үзэсгэлэн худалдаа энэ сарын 28-30-ны өдрүүдэд Чингисийн талбайд зохиогдсон бөгөөд Монгол Улсын 21 аймаг, нийслэлийн есөн дүүргийн ЖДҮ эрхлэгчдийн үйлдвэрлэсэн бараа, бүтээгдэхүүнийг нэг дороос үйлдвэрийнх нь үнээр худалдан авах боломж олгосноороо онцлог байв. Тодруулбал, үзэсгэлэн худалдааны үеэр ЖДҮ эрхлэгчид нийт 85.6 сая төгрөгийн бараа, бүтээгдэхүүн борлуулсан нь тэдэнд томоохон урам өгсөн бодит дэмжлэг боллоо хэмээн онцолж байна.

Энэ үеэр Аж үйлдвэрийн сайд Д.Эрдэнэбат “Аж үйлдвэрийн яам анх удаа орон нутгийн нэрийн бүтээгдэхүүнийг нийслэлд тэр тусмаа төв талбайдаа борлуулах, сурталчлан, таниулах боломжийг олголоо. Иргэдийн үндэсний үйлдвэрлэлээ дэмжсэн үзэл нэмэгдсэнийг өнгөрсөн гурван өдрийн борлуулалтын нийлбэр дүн илэрхийлнэ. Үзэсгэлэн худалдаанд оролцогчдын ялангуяа орон нутгаас ирсэн үйлдвэрлэгчдийн бүтээгдэхүүн үндсэндээ бүгд дууссан байна. Энэ бүхнээс харахад бидний өмнөө тавьсан зорилгын эхлэл зөв голдрилоор явж байгаагийн илэрхийлэл гэж үзэж байна. Цаашид зөвхөн ЖДҮ эрхлэгчдийн төдийгүй хүнд, хөнгөн үйлдвэрлэлийн салбарт ч томоохон үзэсгэлэн худалдааг зохион байгуулж, үйлдвэрүүдийнхээ бараа, бүтээгдэхүүнийг хэрэглэгчдэд таниулна” гэв.

Үзэсгэлэн худалдаанд ЖДҮ эрхлэгчдийн төлөөлөл бүхий нийт 80 гаруй ААН 88 нэр төрлийн бараа, бүтээгдэхүүнээр оролцсон юм. Эдгээрээс шинжлэх ухаан, инновацийн үйлдвэрлэл бүхий “Монхимо” компани “Адуу” брэндийн кальциараа ЖДҮ эрхлэгчдийн “Үндэсний нэрийн бүтээгдэхүүн”-ээр тодорч, Гран При шагналын эзэн боллоо. Мөн аймаг, дүүрэг тус бүрээс “Шилдэг нэрийн бүтээгдэхүүн”-ийг тодруулав. “Үндэсний брэнд-2015” үзэсгэлэн худалдааны үеэр плитаны цавуу зэрэг олон улсын стандартад нийцсэн барилгын материал, төрөл бүрийн эрүүл мэндэд тустай хүнсний бүтээгдэхүүн үйлдвэрлэж байгааг нийслэлийн иргэдэд таниулж чадсан нь бас нэгэн онцлох зүйлсийн нэг байв.

Энэ үеэр үзэсгэлэн худалдаанд оролцож, “Шилдэг нэрийн бүтээгдэхүүн”-ий шагнал хүртсэн төлөөллийн сэтгэгдлийг хуваалцлаа.

М.Ариунаа: Хэрэглэгчиддээ баярлалаа

/“Монхимо” ХХК/

-Шинжлэх ухаан, инновацийн үйлдвэрлэл бүхий “Монхимо” компани 1998 оноос хойш 17 дахь жилдээ эрүүл мэнд, байгаль орчин, шинжлэх ухааны салбарт үйлдвэрлэл эрхэлж байна. Олон жилийн судалгаа, шинжилгээний үндсэн дээр бид “Адуу” брэндээ гаргаж, хэрэглэгчдэд танилцуулсан. “Адуу” брэндийн кальци бусдаас юугаараа онцлог юм бэ гэхээр адууны яснаас гаргаж авсанд байгаа юм. Учир нь адуу яс нь хүний эрүүл мэндэд хэрэгтэй олон төрлийн органик бодисоор баялаг байдаг. Түүнчлэн хүнстэй ижил бүтэцтэй үйлдвэрлэсэн тул хүний биед ямар нэгэн сөрөг нөлөөгүй, шингэц сайтай бүтээгдэхүүн. Импортыг орлосон, экспортын баримжаатай бүтээгдэхүүн юм. Монгол Улсын 21 аймаг, 300 сум, есөн дүүргийн ЖДҮ эрхлэгчдээс шалгарсандаа маш их баяртай байна. Энэ бүтээгдэхүүнийг гаргахад ажилласан эрдэм шинжилгээний багийн залуустаа, хэрэглэгчдэдээ баярлалаа гэж хэлье.

Д.Должин: ЖДҮ эрхлэгчдэд урам хайрласан арга хэмжээ боллоо

/ “Далтмөнгөн шанд” ХХК/

-“Загасгал” цай маань “Шилдэг нэрийн бүтээгдэхүүн”-ээр шалгарсанд баяртай байна. Энэ удаагийн үзэсгэлэн худалдаа ЖДҮ эрхлэгч бидэнд томоохон дэмжлэг болоод зогсохгүй маш том урам хайрласан арга хэмжээ боллоо. Манай “Загасгал” цайг Дорноговьчууд бүгд хэрэглэдэг, мэддэг. Харин нийслэлийн иргэдэд төдийлөн танигдаж амжаагүй байсан юм. Тэгвэл “Үндэсний брэнд-2015” үзэсгэлэн худалдаанд оролцсоноороо Дорноговь аймгийн нэрийн хуудас, брэнд бүтээгдэхүүн болсон цайгаа нийслэлийн хэрэглэгчдэд амжилттай таниулж чадлаа. Үзэсгэлэн зохиогдсон гурав хоногийн хугацаанд бүх бүтээгдэхүүн маань борлогдож дууссан. Нийслэлийн иргэд эрүүл мэнддээ их анхаардаг болсон байна. Цаашид үйлдвэрлэгчдийн бараа, бүтээгдэхүүнийг энэ мэтчилэн хэрэглэгчдэд таниулахад чиглэсэн арга хэмжээ зохион байгуулах нь зүйтэй.

ЖДҮ эрхлэгчдийн “Шилдэг нэрийн бүтээгдэхүүн”-ий шагнал хүртсэн ААН: