Фэйсбүүк хэрэглэгчдээ тагнадаг

Бельгийн эрх баригчид, фэйсбүүк нийгмийн цахим сүлжээ хэрэглэгчдээ тагнадаг хэмээн үзжээ. Үүнтэй холбоотойгоор Бельги улсын шүүх байгууллага ийм үндэслэлээр нэхэмжлэл гаргасан иргэдийн өргөдлийг хүлээн авч буй тухай Британийн “Гардиан” сонинд мэдээлсэн байна.

Нийгмийн цахим сүлжээ хэрэглэгчдээ тагнадгийг баталсан тохиолдолд тус компанид их хэмжээний торгууль ногдуулж, бусад улс орнууд энэ жишгийг дагах болно. Бельгид Хувь хүний амьдралын халдашгүй байдлын хэрэг эрхэлсэн тусгай хорооноос шүүхэд тус цахим сүлжээний эсрэг нэхэмжлэл гаргажээ.

“АНУ-ын Үндэсний аюулгүй байдлын агентлаг иргэдийг дэлхий даяар тагнадаг тухай мэдээлэл ил болмогц хүмүүс сэтгэлээр унасан. Гэтэл “фэйсбүүк” яг үүнтэй адил зүйлийг арай өөр аргаар хэрэгжүүлж байна” хэмээн тусгай хорооны төлөөлөгч Фредерик Дебюссер шүүх хурлын үеэр мэдэгдсэн аж.

Хорооны гишүүд фэйсбүүкийг хувь хүний нууцтай холбоотой Бельги болон Европын бусад орны хууль тогтоомжийг зөрчдөг хэмээн үзжээ. Мөн тус цахим сүлжээ нь хэрэглэгчдийнхээ төдийгүй тус сүлжээнд бүртгэлгүй хүмүүсийн тухай мэдээллийг бусад сайтад “лайк” дарсан мэдээлэл болон найз нарынх бүртгэл дээр түшиглэн боловсруулж тусад нь хадгалдаг аж.

Харин цахим сүлжээний төлөөлөгчид Бельгийн эрх баригчдын зэмлэлийг үгүйсгэсэн байр сууриа илэрхийлжээ. Мөн тус улстай холбоотой мэдээллийг боловсруулах төв нь Исландын Дублин хотноо байрладаг тул Бельгийн шүүх эрх мэдлээс гадна оршдогийг өгүүлсэн байна.

Шүүх хурлын үйл явцыг Европын орнуудад анхааралтай ажиглаж эхэлжээ. Учир нь Нидерланд зэрэг зарим орны эрх баригчид тус цахим сүлжээний талаар шүүмжлэлтэй байр суурь баримталдаг юм

Б.Мөнхболд

Эх сурвалж: “Монголын үнэн” сонин