Ерөнхий сайд “Exclusive” компанийг дэмжиж, татварын газрын даргад анхааруулга өгчээ

Өнөөдөр Монгол улсын Ерөнхий сайд Ч.Сайханбилэг “Exclusive” компанийн захирал Г.Майцэцэг болон Хан-Уул дүүргийн Татварын хэлтэсийн дарга Н.Бадам нартай уулзсан байна. Ерөнхий сайд үүсээд байгаа нөхцөл байдлын талаар хоёр талын байр суурийг сонсож, тодорхой үүрэг далгавар өгсөн байна.

Ерөнхий сайд Ч.Сайханбилэг хэлэхдээ “Энэ асуудал Г.Майцэцэг гэдэг ганц хүний асуудал биш, Монгол улсад үйл ажиллагаа явуулж буй мянга, мянган татвар төлөгчийн асуудал. Тийм болохоор үндэсний баялаг бүтээгчдийн татварын дарамтыг хөнгөлж, данс хааж, дампууруулахаас өмнө боломж олгох хэрэгтэй” гэжээ.

Мөн тодорхой үйлдвэрлэл явуулж байгаа хүмүүсийг ажиллуулж, татвар төлж байгаа хүмүүстээ татвараа төлөхөд нь дэмжлэг үзүүлж, график гаргуулж хугацаа өгөхийг анхааруулжээ. Тус татварын хэлтэсийн дарга нь  Г.Майцэцэгийг шүүхэд өгсөн ба өөрийнхөө үйлдэлийг “Хуулийн хүрээнд авсан арга хэмжээ байсан” хэмээн Ерөнхий сайдад тайлбарласан байна.

Харин “Exclusive” компанийн захирал Г.Майцэцэг “Бид ажил хийж байж л өр төлбөрөө барагдуулна. 150 сая төгрөгийн акт дээр би хүлээн зөвшөөрөөд гарын үсэг зурсан. Миний дансыг нээгээд, эрхийг минь сэргээж өгөөч” гэсэн хүсэлт гаргажээ.