Баян-Уул суманд аврах, гал унтраах анги байгуулна

Дорнод аймагт голлон тохиолддог ой, хээрийн түймрийн нөхцөл байдалтай холбогдуулан хойд бүс нутаг буюу Баян-Уул суманд Аврах, гал унтраах 53  дугаар ангийн байгуулах  Засгийн газрын 80 дугаар тогтоол саяхан батлагдсан. Тус тогтоолын дагуу 4 дүгээр зэрэглэлийн 40 гаруй хүний бүрэлдэхүүнтэй аврах, гал унтраах ангийг байгуулахаар болжээ.

Аймгийн Онцгой байдлын газраас ой, хээрийн түймрээс урьдчилан сэргийлэх, түүнтэй тэмцэх бодлогын баримт бичгийг боловсруулан гаргаснаар сумдын хэмжээнд жил бүрийн төсөвтөө ой, хээрийн түймрээс урьдчилан сэргийлэх зардлыг тусгуулах, зарцуулах эрхийг тусгаж өгсөн байна.

Мөн аймгийн хэмжээнд фургон автомашинтай байгууллага, аж ахуйн нэгжүүдийн жагсаалтыг гаргаж  ой, хээрийн түймрийн үеэр дайчлагддаг байхаар зохицуулалтыг хийсэн нь ой, хээрийн түймрээс урьдчилан сэргийлэх, тэмцэх чиглэлээр хийсэн томоохон ажлын нэг болжээ.