“Sinopec” “Caspian Investment Resources”-ийн 50 хувийг худалдан авав

БНХАУ-ын төрийн өмчит “Sinopec” компани Казахстаны газрын тосны олборлогч “Caspian Investment Resources” компанийн 50 хувийг “Lukoil” компаниас 1.09 тэрбум ам.доллараар худалдан авлаа.

Ингэснээр “Caspian Investment Resources” компанийг БНХАУ-ын хөрөнгө оруулагчид 100 хувь эзэмших болсон байна. Казахстаны Засгийн газрын зүгээс “Caspian Investments Resources” компанийг худалдах эрхийг өнгөрсөн сард өгсөн аж.

Тус компани Казахстанд 200 сая баррель газрын тос болон байгалийн хийн нөөцтэй дөрвөн талбай эзэмшдэг гэж “Moody’s” мэдээлжээ. Энэ оны эхэнд “Lukoil”-ийн зүгээс “Sinopec” өмнөх гэрээнээс татгалзан худалдан авах хүсэлгүй байгаагаа илэрхийлсэн гэж мэдээлж байсан юм.

Улмаар арбитрын шүүхэд хандахаар бэлтгэж байсан ч талууд дахин хэлэлцээрийн ширээний ард сууж ийнхүү тохиролцоонд хүрсэн байна. Казахстаны “Caspian Investment Resources” компанийн 50 хувийг анх Лакшми Миттал тэргүүтэй хөрөнгө оруулагчид найман жилийн өмнө 980 сая ам.доллараар худалдан авч байсан ч 2010 онд “Sinopec” тэргүүтэй БНХАУ-ын түншлэлд эргүүлэн зарж байжээ.

Д.Хаш-Эрдэнэ

Холбоо барих: khasherdene.d@bloombergtvmongolia.com

minjma.g@bloombergtvmongolia.com