Тусгай зөвшөөрлийн өргөдлийн дугаарыг даваа гарагаас олгоно

-Зүүн бүсэд нийт 11.94 сая га талбайд хайгуулын тусгай зөвшөөрөл олгоно-

Зүүн бүсийн аймгуудад хайгуулын тусгай зөвшөөрөл хүссэн өргөдлийн дугаарыг ирэх даваа гараг буюу наймдугаар сарын 24-нөөс олгож эхлэх гэж байна. Засгийн газраас энэ бүс нутагт нийт 11.94 сая га талбайд хайгуулын зөвшөөрөл олгохоор шийдвэрлэсэн.

Мөн баруун бүсийн 1.95 сая га талбайд дахин өргөдөл хүлээн авна гэж Ашигт малтмалын газрын Кадастрын хэлтсийн дарга Н.Чинбаатар мэдэгдлээ.

Ашигт малтмалын газар өнгөрсөн хугацаанд Монгол орны баруун бүсийн хоёр сая гаруй га талбайд хайгуулын 452 тусгай зөвшөөрөл олгосон байна. Тус газар өнгөрсөн нэгдүгээр сараас баруун бүсийн нийт есөн сая га талбайд хайгуулын тусгай зөвшөөрөл олгохоор болсон. Энэ хүрээнд нийт 1094 өргөдөл хүлээн авчээ.

Мөн тусгай зөвшөөрлийг өргөдлөөр олгохоос гадна улсын төсвөөр хайгуул хийсэн 10 гаруй сая га талбайд сонгон шалгаруулалтаар олгож байгаа. Өнгөрсөн хугацаанд 10 талбайд сонгон шалгаруулалт зарласнаас хоёр нь амжилттай болжээ. Харин үлдсэн найман талбайд тусгай зөвшөөрөл хүссэн санал ирээгүй тул өргөдлөөр олгохоор болсон тухай Ашигт малтмалын газраас мэдээллээ.

Монгол Улсын нутаг дэвсгэрийн 19 хувь буюу 31 сая гектар талбайд хайгуулын тусгай зөвшөөрөл олгохыг Засгийн газар зөвшөөрсөн юм. Одоогоор зөвшөөрөл авах хүсэлтэй нийт 1000 гаруй аж ахуйн нэгж байгаагийн 94.6 хувь нь дотоодын хөрөнгө оруулалттай байна.

Иргэд, аж ахуйн нэгж тусгай зөвшөөрөл авах хүсэлтээ Ашигт малтмалын газарт бүртгүүлэн, VPN төхөөрөмж, системд нэвтрэх эрх авна. Улмаар VPN төхөөрөмжөө ашиглан системд нэвтэрч, www.login.mram. gov.mn цахим сайтад хандан өргөдлийн дугаар авах ёстой аж.

Хэрэв дугаараа авсан бол заасан хугацааны дагуу өргөдлөө гаргах боломжтой гэж албаныхан мэдэгдлээ.

Г.Байгал

Засгийн газрын мэдээ