“Хар алт”-ны ордуудын төлөөх өрсөлдөөн ширүүсч байна

Нүүрсний акулыг нэгт тооцогддог “Rio Tinto” группийн гурван тэрбум ам.долларын нүүрсний бизнесийг авах өрсөлдөөнд “Shenhua” групп нэгдсэн талаар “Australian Financial Review” агентлаг мэдээллээ. Сүүлд “Shenhua” группийн Австралид хэрэгжүүлэхээр төлөвлөсөн, нэг тэрбум ам.долларын “Watermark” эрчим хүч болон сул коксжих нүүрсний төслийн зөвшөөрлийг Австралийн Байгаль Орчны сайд эргэн харна гэж мэдэгдсэн байна. Тиймээс тус компани шинэ төслөөс илүүтэйгээр “Rio Tinto”-ийн ордуудыг авах сонирхол ихтэй байж магадгүй байгаа аж.

Өнгөрсөн долоо хоногт “Rio Tinto” группийн Гүйцэтгэх захирал Сэм Уолш “Bloomberg”-т өгсөн ярилцлагадаа хангалттай санал ирвэл худалдан авах саналыг сонирхож үзнэ гэдгээ илэрхийлсэн байна. Тиймээс тус компанийн нүүрсний ордуудын төлөөх өрсөлдөөн ширүүсчээ. Одоогоор зургаан компани саналаа хүргүүлээд байгаагаас өнгөрсөн онд “Rio Tinto” группийг бүхлээр нь худалдан авах оролдлого хийсэн “Glencore” болон Английн “X2 Resources” компаниуд хамгийн хүчтэй тоглогчоор тооцогдож байна. “Glencore”-ийн нүүрсний ордууд “Rio Tinto”-ийн ордуудтай залгаа оршдог. Тиймээс дээрх хоёр компанийн нүүрсний уурхайн үйл ажиллагаа нэгдвэл жил бүр 500 сая австрали долларын хэмнэлт гарах боломжтой талаар “Glencore” мэдээлж байсан юм. Эх сурвалжуудын мэдээлснээр “Glencore”-ийн зүгээс өрсөлдөөн ширүүссэнтэй холбоотойгоор “Rio Tinto”-д тавих үнийн саналаа нэмэгдүүлжээ. Учир нь гол өрсөлдөгч болох “X2 Resources” компанид хөрөнгийн зах зээлээс босгосон 5.6 тэрбум ам.доллар зарцуулахад бэлэн байгаа юм байна.

“Rio Tinto” групп 3.1 тэрбум ам.доллараар үнэлэгдэж байгаа нүүрсний бизнесээ дөрвөн тэрбум ам.долларт хүргэж зарах сонирхолтой байгаа ажээ. Өнгөрсөн онд тус групп нүүрсний салбараа зэсийн групптэй нэгтгэсэн юм.

Ж.ЧИМЭГ