Энэтхэгийн Ерөнхий сайд АНЭУ-д айлчилна

Энэтхэгийн Ерөнхий сайд Нарендра Моди сүүлийн 34 жилийн хугацаанд анх удаа Арабын Нэгдсэн Эмирт Улсад /АНЭУ/ айлчилна. Энэ тухай “Asian Age” сонинд мэдээлжээ.

Тус сонины эх сурвалжийн мэдээлснээр, Моди АНЭУ-д хоёр өдрийн айлчлал хийхээр тус улсыг наймдугаар сарын 16-нд зорино. Тэрбээр худалдаа болон аюулгүй байдлын асуудлаар тус улсын эрх бригчидтай хэлэлцээ хийж, Абу-Даби болон Дубай хотод айлчилна.

Үүнээс гадна, Моди Дубай хотын цэнгэлдэх хүрээлэнд Энэтхэгийн нийгэмлэгийн баярын хүлээн авалтад оролцох ажээ. Энэ арга хэмжээнд зориулж цахим хуудас болон “Facebook”сүлжээнд тусгайлан хуудас нээсэн байна.

“Hindu” сонинд урьд нь мэдээлж байснаар, Энэтхэгийн Ерөнхий сайд АНУ, Их Британид намар айлчилж, АСЕАН болон “Их 20”-ийн дээд хэмжээний уулзалтад оролцоно. Нарендра Моди есдүгээр сард АНУ-д хоёр дахь удаагаа айлчилна. Дараа нь 11 дүгээр сарын 15-16-нд “Их 20”-ийн дээд хэмжээний уулзалтад оролцохоор Туркийг зорих бөгөөд үүний дараа 20-21-нд Малайзад болох АСЕАН болон Зүүн Азийн дээд хэмжээний уулзалтад оролцох аж. Тэрбээр мөн Мьянмар, Сингапур, Вьетнам улсад айлчлах төлөвтэй байна.