“Silence White” 24-нд товлогдлоо
“Silence White” Монголын тэргүүлэгч бүжгийн хэмнэл 10 дахь жилдээ долоодугаар сарын 12-нд товлогдсон байсан ч цаг агаарын таагүй нөхцөлөөс болон хойшлогдсон билээ. Тэгвэл тэд энэ удаад товоо шинэчлэн энэ сарын 24-нд буюу ирэх баасан гарагт уулзахаар болзоо тогтоолоо.
“Silence White” шоуны талаар эргэн сануулахад, нийслэлийн дэгжин залуус 2005 онд анх удаа цасан цагаан гоёлоор ижилсэн “Silence club”-д дэлхийн өнцөг булан бүрт уламжлал болон зохиогддог “Silence White” үдэшлэгийг хийж байсан билээ. Жил ирэх тусам хүрээгээ тэлэн бууриа сэлгэн Үндэсний соёл амралтын хүрээлэнг сонгосон Монголын тэргүүлэгч бүжгийн хэмнэл “Silence White” үдэшлэг 10 дахь жилдээ ийнхүү Үндэсний соёл амралтын хүрээлэнгийн шинэ талбайд болох гэж байна.
Дэлхийн өнцөг булан бүрт өөр өөрийн онцлогийг шингээн болдог уг үдэшлэг энэ жил ”Энх тайван, Эрх чөлөө, Эв нэгдэл” уриан дор Монголын залуусыг доргиох нь. Хотын соёл, орчин үеийн хөгжмийн чиг хандлагыг тодорхойлох, Монголын бүжгийн хөгжмийг хөгжүүлэн, сурталчлан таниулах үндсэн зорилготой юм. Мөн жил ирэх бүр оролцогчдын тоо өсөн нэмэгдэхийн хэрээр зорилгын хүрээ тэлж, монголын орчин үеийн залуусын соёл, бүтээлийг дэлхий дахинд сурталчлан таниулах, залуусын нийгэмд хандах хандлагыг эерэгээр өөрчлөх зорилтыг тавин ажиллаж байгаа юм.
“Найрсаг Улаанбаатар” хөтөлбөрийн хүрээнд гурав дахь жилдээ зохион байгуулагдаж буй “Silence White” үдэшлэг залууст зориулан орчин үеийн технологи бүхий цогц шийдэлтэй хөтөлбөрийг хэрэгжүүлэх аж. Электро хөгжмийн хэмнэлд, цасан цагаан гоёлтой залуус, зуны нэгэн үдшийг бут авах нь ээ.
URL:
