Өнөө жилийн зассан замаа хойтон нураана

Хот маань сайхан замтай болж байна. Даанч зогсоол байхгүй. Байсныг нь бүгдийг нь хаагаад наагуур нь хашлага тавьчихсан. Ингээд өнөө сайхан замын нэгдүгээр эгнээ бүхэлдээ зогсоол болж, түгжээ бөглөрөл урдын адил хэвээрээ. Ажил хийгээд байгаа мэт харагдавч ард нь дандаа ашиг сонирхол нуугдаж байдгийн тод жишээ энэ болов. Уг нь иргэдийн сэтгэлд нийцсэн, хэрэгцээг хангасан ажил хийх нь төрийн үүрэг боловч энэ бол цаасан дээр байдаг уриа. Замын зогсоолуудыг хааж, Улаанбаатарыг зогсоолгүй болгох гь нэлээдгүй хүний ашиг сонирхолд нийцэж байгаа юм байна. Тиймээс шинээр тавьж байгаа зам бүрийн зогсоолыг нэг бүрчлэн хааж санаагаа амраажээ.

Хотын ерөнхий менежерийн хэлснээр замын хажуугийн зогсоолыг хамгийн их эсэргүүцэж хаалгаж байгаа хүмүүс нь Замын цагдаагийнхан. “Замын дэргэдэх зогсоол осол аваар гарахад их нөлөөлдөг учраас бүгдийг нь хаа” гэж мундагддаг гэнэ тэд. Зураг төслийнхөө дагуу хийж байгаа учраа тайлбарлах хүмүүсийн бичиг баримтыг хурааж, дарга цэргийг нь басамжилж байгаад хуу хаалгасан гэсэн. Зогсоол барихыг хамгийн их дэмжих хүмүүс нь замын цагдаагийнхан баймаар. Тэгээд ч зогсоолоос болоод осол гардаг гэхэд тун үнэмшилгүй. Энэ бүхнийг цаагуур нь ухаад бодвол замын цагдаагийнхны зөв юм шиг. Тэд тун овжноор өөрсдийнхөө ажлыг хөнгөвчилж, ашиг орлогоо нэмэгдүүлэх замаа олоод авчээ. Хэн хэзээ зөрчил гаргахыг нь хүлээж наранд нозоортлоо зогссоноос нэгдүгээр эгнээгээр зогссон машинуудын дугаарыг нь түүгээд байхад хийх ёстой орлогоо давуулан биелүүлнэ. Зогсоол байхгүй юм чинь тэнд машин тавьж л таараа. Машин тавьсан юм чинь дугаарыг нь хурааж л орхино. Амар байгаа биз. Ядаж яаж ч угаагаад шилнээс салдаггүй торгуулийн шар цаасныхаа цавууг жаахан бага түрхээсэй билээ.

Зогсоолыг эсэргүүцэж байгаа хүмүүсийн нөгөө хэсэг нь хотынхон өөрсдөө юм шиг. Нийслэлийн орлогч Б.Мөнхбаатар дарга Бага тойруугийн замын ажлыг хариуцан хийлгэж байгаа гэсэн. Зогсоолын тухай ярих үеэр “Дандаа битгий болохгүй бүтэхгүй юм ярьж бай” хэмээн ундууцжээ. Ирэх жил Бага тойруугийн шугам сүлжээг солих ажил хийх юм байна. Тэр үеэрээ ил зогсоол барихаар тэд төлөвлөсөн бололтой. Хоёр жилийн өмнө Зуун айл орчмын замыг шинэчилсэн. Удалгүй шугам солино гээд шинээр тавьсан замаа ухаад хаячихсаныг бид халаглан харж байсан. Тэгвэл энэ туршлага хойтон жил Бага тойруу дээр дахин давтагдах нь. Зунжингаа л хотын замыг хааж шороо тоос бужигнуулсан. “Сайхан замтай болж байвал энэ зэргийн шороо гайгүй ээ” хэмээн тэвчээртэй хүлээж байсан нийслэлийнхний урам нь хугарах байх даа. Ирэх зун Бага тойруу орчим дахиад л газар шорооны ажил эхэлнэ. Шинэхэн тавьсан явган хүний замыг хуулж, авто замын хажууг сэтэлж дулааны шугам солино. Дахиад л тоос шороо босч, тэр хавиар явахад хэсэгтээ хэцүү болно. Нэг мөр цэгцлэх ажлыг ингэж цувруулан хийх нь олон хүний ашиг сонирхолд нийцдэг бололтой.

Яг энэ өдрүүдэд нийслэлээс баруун тийш гардаг зам, Дарь эх, Офицеруудын ордны тойргоос Чулуун овоо хүртэлх замыг хаагаад засаж янзалж байна. Шинээр тавьж байгаа замын хажуугийн зогсоолыг бас л хааж байгаа гэсэн. Улаанбаатар хэзээнээсээ авто зогсоол багатай. Дээр нь бүр зогсоолгүй болгох сонирхолтой хүмүүс нэмэгдсээр байгаа нь иргэдийн дургүйцэл, бухимдлыг нэмж байна.

Шинээр баригдаж байгаа барилгуудын хувьд бүр асуудалтай. Тэнгэр баганадсан барилгууд өмнөө арав хүрэхгүй машины зогсоолтой. Томхон худалдааны төвүүд ч машин тавих газаргүй. Барилга барих зөвшөөрөл өгөхдөө, барилгаа хүлээж авахдаа тэрийг анзаарсан хүн байдаг болов уу. Хамгийн сүүлд нээлтээ хийсэн “Макс”-ийн хоёр өндөр цамхаг харин дороо хоёр давхар машины зогсоолтой гэсэн шүү.

Төрд ажилладаг хүн бүр, төрийн байгууллага бүхэн өөр өөрийн эрх ашгаа бодон нийтийн ажилд иймэрхүү л хандаж байна. Уг нь Замын цагдаа ч бай, Авто замын газар, хотын удирдлагууд ч бай бүгд л төрийн үйлчилгээнийхэн. Тэднийг ажилла гэж сонгосон учраас хүмүүсийн төлөө ажиллах ёстой.

Тэдний ажил иргэдэд таалагдаж байх нь үр дүнгийн үндсэн шалгуур нь. Гэтэл төрийн үйлчилгээний байгууллагуудын ажил нь хоорондоо уялдаж өгдөггүй. Нэг нь шинэ ажил эхэлж байхад нөгөө нь түүнийг нурааж байдаг тогтсон ёстой. Энэ хэдэн хүмүүсийн ажлын үр дүнд нийслэлийнхэн жилжингээ зутруу амьдарч байна. Ухаж төнхсөн нүх, зайгүй босох тоос шороо нь утаанаас дээрдээд байх юмгүй. Үнэндээ зуныг ундуй сундуйхан л өнгөрөөлөө. Тэгээд сайхан зам тавьжээ гэж бодоход хойтон дахиад нураана гэж байгаа…

Д.ОЮУНТУЯА