УЛААНБААТАРЫН ЭДИЙН ЗАСГИЙН ХУРАЛ БОЛЖ БАЙНА

Улаанбаатарын эдийн засгийн хурал нь долоодугаар сарын 2-3-нд МУИС-ийн дэргэдэх Монгол-Япон төвд болж байна. Улаанбаатарын тодотголтой энэхүү олон улсын эрдэм шинжилгээний хурал нь гурав дахь удаагаа зохион байгуулагдаж байгаа бөгөөд өмнө нь 2010, 2013 онуудад болж байжээ. Уг олон улсын эрдэм шинжилгээний хурлыг Монголын Эдийн Засгийн Холбоо зохион байгуулж байгаа юм.

Энэ жилийн хурал нь залуу эдийн засагчдын чадавхийг нэмэгдүүлэх, ялангуяа эдийн засгийн боловсролыг дээшлүүлэхэд давхар анхаарал хандуулж байгаагаараа өмнөх жилүүдийнхээс онцлогтой. Энэхүү олон улсын xуралд дотоод, гадаадын их дээд сургуулиуд болон Монголбанк, Сангийн Яам зэрэг байгууллагуудын мэргэжлийн эдийн засагчид оролцож байна.