Н.Алтанхуягийн хуулийн төсөл дэмжигдсэнээр “Алтангадас” аврагдах уу

АН-ын “Алтангадас” фракци “унтжээ”. “Алтангадас” фракцаа аврах хүсэл Н.Алтанхуягт бий. Энэ ч үүднээсээ тэр өөрөө унтаа байдлаасаа гарч, Ч.Сайханбилэгийн Засгийн газрыг шүүмжилж, бас болоогүй гишүүнийхээ үүргийн дагуу хуулийн төсөл өргөн мэдүүлээд байгаа. “Н.Алтанхуяг хуулийн төсөл өргөн барьжээ” гэх мэдээ өнгөрсөн долоо хоног цацагдсан. Харин түүний өргөн мэдүүлсэн Эрүүгийн байцаан шийтгэх хууль, Прокурорын байгууллагын тухай хуульд нэмэлт, өөрчлөлт оруулах тухай хуулийн төслийг УИХ дахь АН-ын бүлэг болон “Шударга ёс” эвслийн бүлэг дэмжсэн мэдээлэл байна.

Ийнхүү хуулийн төсөл нь бүлэг дээр дэмжигдэж байнаа гэдэг нь байнгын хороо, чуулганаар хэлэлцэхэд бас ч хийж том дэмжлэг болох юм. Хууль зүйн сайд Д.Дорлигжавын хувьд өмнөх сайд Х.Тэмүүжингийн шийдвэрийг цуцлуулахаар шийдчихсэн. Гэтэл үүнийг нь өмнөх намын дарга Н.Алтанхуяг нь эсэргүүцэж, хуулийн төсөл өргөн бариад байна. Нэг үгээр хэлбэл, хуулийн салбарынхнаар “тоглож” байна.

Ерөнхий сайд, Ардчилсан намын дарга байсан Н.Алтанхуяг тухайн цаг үед Х.Тэмүүжинг дэмжиж, хуулийг батлуулсан нэгэн. Ингэхдээ өөрийнх нь эргэн тойронд нэр холбогдоод байсан хүмүүсээ “аврах” хүсэл нуугдаж байсан. Энэ нууцхан гэмээр ил хүсэл нь өнөөдөр ч хэвээр. Хүргэн дүү Г.Дэнзэн, ахлах зөвлөх Л.Гансүх, найз Сайнбилэг гээд түүний эргэн тойрон дахь олон хүн АТГ-т шалгагдаж, зарим нь цагдан хоригдож байгаа.

Нэр холбогдоод байгаа энэ муу нэр нь “Алтангадас”-ын нэр хүндийг унагаасаар байгаа юм. Уг фракцийн удирдагч тэрбээр фракциа, өөрийн нэр хүндээ ч тэр өргөн мэдүүлсэн хуулийн төслөөрөө дамжуулан нэмэхээр шийдэж. Харин энэ удаа түүний эргэн тойрон дахь хүмүүс хэрхэх бол гэдэг нь сонин.

АТГ-ын дэргэдэх Мөрдөн байцаах албыг эрх мэдэлтнүүд “булаацалдах” болсон. Хуулийн төслийг өргөн мэдүүлж, бие биеийнхээ дээр гарахаар хичээж байна.

Уг нь бол 2014 оны нэгдүгээр сарын 24-ний өдөр Прокурорын байгууллагын тухай хуулийн 10, 45 дугаар зүйлийг хүчингүй болгосноор Улсын ерөнхий прокурорын дэргэдэх Мөрдөн байцаах албыг татан буулгаж УИХ-ын 2014 оны нэгдүгээр сарын 24-ний өдрийн 22 дугаар тогтоолоор Улсын ерөнхий прокурорын дэргэдэх Мөрдөн байцаах албаны орон  тоо, төсөв, эзэмшиж байгаа үл хөдлөх болон бусад эд хөрөнгө, техник хэрэгслийг Авлигатай тэмцэх газарт шилжүүлсэн. Гэтэл энэ нь хүний эрхийг зөрчсөн ямар нэг үйлдэл гарахыг мэдэхгүй өнгөрөх тал байна гэж УИХ-ын гишүүн Н.Алтанхуяг үзсэн бололтой. Гэсэн ч тэр “Алтангадас”-аа аварч чадах уу.

Ц.Цацрал

zaluu.com