Цемент, хиймэл зүлгэн дээр бөхчүүд нь унаж бэртэх вий дээ
Төрийн их баяр наадам болоход сарын хугацаа үлджээ. Тэгвэл бөхчүүдийн зодоглон дэвж, ур ухаан, бяр хүчээ уралдуулдан барилддаг Төв цэнгэлдэхийн зүлэг ногоон дэвжээг цементээр цутгаж, хиймэл зүлгээр солих ажил ид хийгдэж, 70 гаруй хувьтай явж байгаа талаар эх сурвалж хэлэв.
Уг ажлыг “Дэрэн” компани гүйцэтгэж байгаа юм. Тэгвэл энэ ажил ард иргэдийн дунд бөхчүүд халтирч унах, гэмтэл бэртэл авах эрсдэлтэй, дэмий юм хийж байх юм гэсэн шүүмжлэлийг бий болгоод байгаа юм.
Энэ талаар “Дэрэн” компанийн захирал Г.Мөнхчулуун “Хиймэл зүлэг бол манай орны цаг агаарын байдлын хувьд хамгийн оновчтой. Байгалийн зүлгийг ашиглахад бороо орсоны дараа хальтрахаас авахуулаад асуудал ихтэй, эдэлгээ муутай байдаг. Тиймээс сүүлийн үед олон улсад хиймэл зүлгийг сонгож байна. Манай ихэнх сургуулийн талбайд зүлгийг дангаар нь тавиад орхичихдог учраас хатуу, стандарт бус байдаг. Хиймэл зүлэг нь 4-8 мм-ийн хотойлттой, доороо дүүргэлттэй байх ёстой. Тэгэхээр энэ жилийн наадмын талбайн зүлэг 8 мм хотойлттой байх ба дор нь 30 мм-ийн дүүргэлт хийх 120 тн дүүргэлтийн материал бэлтгэсэн. Ингэснээр бөхчүүд чанга унаж ойчлоо ч гэмтэл, бэртэл авахгүй. Хүлээлгэж өгөхдөө хэмжилтийн багаж ашиглаж, шалгаж өгнө” гэв.
Энэ сарын 20 гэхэд дуусгахаар төлөвлөсөн уг ажилд нийтдээ 1 тэрбум 200 сая төгрөг зарцуулж байгаа аж.
URL:
