“МАН-ын хийсэн хаалга” гээд аймгийн угталт, үдэлтийн хаалгаа тайрдаг “галзуу” дарга

Засагт ханы хөх харчуудын зартай сайхан нутаг Говь-Алтайд “үлгэрийн юм шиг үйл явдал” их өрнөх болж. Энэ нь угтаа дарга даамал, Засаг ноёнтой холбоотой юм.

2014 оны эхээр тус аймагт орон нутгийн дахин сонгууль болж Ардчилсан нам ялалт байгуулан О.Амгаланбаатар Засаг даргаар сонгогдсон.

Гэвч жил гаруйхны хугацаанд энэ нэр олон нийтэд хэдийнэ “танил”болжээ.

Өнгөрсөн өвөл “ард түмнийг эрүүл аюулгүй ундны усаар хангахад итгэл зүтгэл гарган ажиллана” гэж том сурталчилгааны уриа лоозон бүхий цэвэр усны хаяг шошгонд О.Амгаланбаатар даргыг томоос том хөрөг зураг, гарын үсэг эгээтэй л Хойт Солонгосын удирдагч Ким Чен Уныг санагдуулам байсан билээ.

Тэр бүү хэл Говь-Алтайн сумдын 90 жилийн ойд зөвхөн тус аймгийн харьяат бөхчүүд барилдаж, мөн нутгийн уугуул иргэний морь уралдах ёстой гэж зарлигдаж захирамж гаргаж байсан “галзуу дарга”.

Түүний “галзуу үйлдэл” үүгээр хязгаарлагдахгүй. Аймгийнхаа Хүнс, хөдөө аж ахуйн газрын дарга Амартүвшинтэй улсын сайн малчин шалгаруулах болзлоос үүдэн ам зөрөлдөж, улмаар хэвтэрт ортол нь зодсон гэдэг мэдээлэл мөн л чих дэлсээд авсан. Энэ мэдээллийн “утаа” арилж амжаагүй байхад шахам Японд хөгөө чирж  метрогоор зорчих картыг авалгүй хориглосон төмөр хаалтан дээгүүр гүйж харайж яваад цагдаад нь баригджээ.

Ийм “галзуу” авиртай Засаг ноёнтон нам улстөрийн үзэл бодлоор төрийн ажлыг явуулж одоо бүр МАН-ын хийсэн юм гэдэг нэрээр өмнөх ажлыг нь “сүйдэлж” эхэлж. Бэлхэн жишээ гэвэл аймгийн угталт, үдэлтийн хаалгыг “МАН-ын хийсэн хаалга гээд тайрч хаясан” гэдгийг хамгийн ойрын эх сурвалж хэлж байна.

Орон нутаг энэ мэтчилэн “эрх мэдэлдээ ташуурсан” дарга даамлын тоглоомын бай биш байлтай. Нэг нам, улс төрийн хүчин солигдоход нөгөөх нь гарч ирээд хийснийг нь эвдэж нурааж байдаг “галзуу” тогтолцоог яах вэ, Ерөнхий сайд аа.

Г.Эрдэм

Эх сурвалж: www.Ugluu.mn