Популист мөн, биш

Тавантолгойн төслийг урагшлуулах, ухраах хоёр өөр байр суурь улс төрийн хүрээнд хүчтэй явж байна. Тэр дундаа УИХ-ын дарга болон Засгийн газрын хооронд сөрөг байр суурь байгаа нь хэн үнэн, хэн худал ярьж байгааг ойлгоход хэцүү. УИХ-ын дарга З.Энхболд хэд хэдэн хэвлэлд ярилцлага өгч, зөвлөх А.Гансүхээрээ үндэсний телевизэд ярилцлага өгүүлж байр сууриа илэрхийлсээр байна.

Төслийн удирдагч, сайд М.Энхсайхан ч нөгөө талын байр сууриа илэрхийлсээр. Тэрээр Засгийн газрын гишүүн учраас Ерөнхий сайдын байр суурийг илэрхийлж буй гэж ойлгогдохоор байна. Ингэхдээ нэг, нэгийгээ популист гэж цоллож байгаа ч яг хэн нь популизм хийж байна вэ гэдэг нийгэмд ойлгомжгүй байна. Тавантолгойн талаар УИХ-ын дарга З.Энхболдын зарим хэвлэлийн өчигдрийн дугаарт өгсөн яриа, сайд М.Энхсайханы уржигдрын ярилцлагаас ишлэв.

З.Энхболд: М.ЭНХСАЙХАН ГЭДЭГ ХҮН ЮУ ХИЙСЭН ЮМ БЭ?
-М.Энхсайхан гэдэг хүн юу хийсэн юм бэ. Миний хувьд тэр үед тэгж зогсоохоос өөр арга надад үлдсэнгүй. УИХ-ын веб сайтад байгаа тэр Тавантолгойн гэрээг зурахаар албан ёсоор санал авахаар явуулсан байгаа юм. Хаврын чуулганы нээлтэд хэлэх үгээ Тавантолгойгүйгээр хэлэхээр бэлдчихсэн байсан. С.Ламбаа гуайн бэлдсэн үг байгаа юм. Гэтэл өглөө нь тэр гэрээг аваад үзтэл Монголын ард түмний эрх ашиг, тухайлбал хувьцаа эзэмшигч миний эрх ашгийг уландаа гишгэсэн байсан.

Нүүрсний үнэ одоогийн ханшаар байна гэж үзэхээр Тавантолгой жилдээ 25 сая ам.доллар авахаар, түүнийхээ хариуд хоёр хувийн тусгай роялти авахаар байгаа. Бүх эрх мэдлээ өгөөд лиценз гэж цааснаас өөр юмгүй үлдэхээр болгочихсон байгаа юм. УИХ-д сонгогдоогүй, ард түмнээс мандат аваагүй М.Энхсайхан гэдэг нэг сайдаар хоёр сая хувьцаа эзэмшигчийн хувь заяаг 70 жилээр өгөөд явуулчихмааргүй байгаа юм. М.Энхсайханы шинэ гэрээнд ч, хуучин гэрээнд ч маш ноцтой заалтууд бий. А.Гансүх зөвлөхөөр гэрээний заалтуудыг шүүлгэж байгаа.

М.Энхсайхан: УИХ-ЫН ДАРГАД ИТГЭСНЭЭС ЕРӨНХИЙЛӨГЧИД ИТГЭСЭН НЬ ДЭЭР
-Тавантолгойг тойроод цэвэр улс тер өрнөж байгаа харагдах юм. АН-ын дотор “хэн нь том бэ” гэдэг өрсөлдөөн хувь хүмүүсийн араншингаар дамжиж УИХ, Засгийн газрын хоорондын зөрчил болж харагдаж байна. МАН ч Тавантолгойн асуудлыг УИХ-д оруулах хэрэгтэй гээд дарга нь гарын үсэг зурсан. “Чалко”-д асар их хэмжээний өр тавьсан, хэрэг дээрээ 15 жилээр Тавантолгойг барьцаанд өгөх гэрээг хийж байх үед Чалкогийн гэрээг УИХ-д татан авч хэлэлцээгүй. Тэр үед МАН таг байсан. АН ч таг байсан.

Тэр гэрээг ер нь монгол хүн уншаагүй юм шиг санагдсан. Өр тавьсан, барьцаанд орсон Чалкогийн гэрээг УИХ хэлэлцээгүй атлаа Тавантолгойн төслийг улстөржүүлж байгаа нь “гадаад” захиалгатай гэж эрхгүй бодогдуулж байгаа. Тиймээс би УИХ-ын даргад итгэснээс Ерөнхийлөгчдөө итгэсэн нь дээр гэж бодож байна. Учир нь, Ерөнхийлөгч бол бүх ард түмнээс сонгогдсон, Монголын ард түмний нэрийн өмнөөс ярих эрх бүхий цор ганц хариуцлагатай албан тушаалтан. УИХ-ын гишүүдийн хувьд тойргоо, намаа төлөөлнө биз.

М.Цэцэг

Зууны мэдээ