МЗХ-оос гаргах 2016 онд сонгож болохгүй хүмүүсийн хар жагсаалтын тэргүүнд А.Мөнхбат өөрөө бичигдэх учиртай

Монголын Залуучуудын холбооноос УИХ, Орон нутгийн сонгуулиар дэмжиж болохгүй этгээдүүдийн нэрийг жагсаасан “Хар жагсаалт” олон нийтэд танилцуулна гэж мэдэгдэн  Холбооны ерөнхийлөгч А.Мөнхбат үүнийг албан ёсоор илэрхийлнэ билээ.  Үүнтэй холдбогдуулан хэд хэдэн зүйлийг хэлэх нь зүйтэй гэж бодлоо.

Юуны өмнө МЗХ гэдэг байгууллага бол улс төрийн байгууллага биш. Дээр нь энэ холбоог  удирдаж байгаа Ерөнхийлөгч А.Мөнхбат гэх эрхэм Монголын нийт залуучуудыг төлөөлөх эрхгүй нэгэн. Үүний тод жишээ бол саяхан ”чимээгүйхэн” болоод өнгөрсөн МЗХ-ны V  хурлаар  А.Мөнхбат өөрийгөө батламжуулахын тулд  80.0 мянган хүн амтай аймгаас өөрийн  талын 2 төлөөлөгчөөр дамжуулан, тэднийг “хайрцаглаж” байж  батламжуулсан гэдгийг эх сурвалжууд батладаг. Тэгэхлээр 80 мянган хүн амтай тухайн аймгийн залуучуудыг  МЗХ-ны 2 төлөөлөгч төлөөлж чадах уу гээд асуудал яригдах шаардлагатай болно. Тийм атал үүнийг л хайхран МЗХ-ны Ерөнхийлөгч гэх энэ эрхэм өнөөдөр сонгож болохгүй хүмүүсийн хар жагсаалтыг гаргаж танилцуулах юм гэнэ. МЗХ-ны V  хуралд оролцсон эдгээр залуус монголын мянга мянган залуусыг төлөөлж чадах уу..

Үүний цаана АН-ын PR явж байгааг төвөггүйхэн ойлгож болох.  А.Мөнхбат бол Ерөнхий сайд Ч.Сайханбилэг, ЗГХЭГ-ын дарга С.Баярцогт нарын “гарын хүн” гэдгийг Монгол даяараа  бид мэднэ. Түүнийг  АН засгийн эрх барьж байгаа ойрын хэдэн жилүүдэд МЗХ-ны  төсөл хэрэгжүүлж байгаа нэрийдлээр нэлээд “бэлжиж” авсан гэж эх сурвалжууд хэлэх юм билээ.

Саяхан л  гэхэд Хөдөлмөрийн сайд асан Я.Санжмятавтай байгуулсан 600 саяын гэрээ нь олон нийтэд ил болж мань эрийг багагүй сандараагаад авсан.  Эл гэрээний зардлууд дотор вэб сайт хийлгэх, түүнийг хөгжүүлэх нэрийн дор 38 сая төгрөг төсөвлөсөн байсан нь энэ салбарт ажилладаг хүмүүсийн “нүдийг орой  дээр нь гаргасан” мэдээлэл болсон. Хамгийн супер вэб сайт хийх дээд үнэ 10.0 сая төгрөгөөс хэтрэхгүй атал МЗХ-ны Ерөнхийлөгч 38.0 сая төгрөгөөр холбооны хүрээндээ хэрэгжүүлсэнн төсвийнхөө  вэб сайтыг хийлгэсэн гэхээр яагаад ч  үнэмшил  төрөхгүй байгаа юм.  Тэд ингэж л төсвийн хөрөнгийг зарцуулж байна  шүү дээ.

Уг нь МАН, АН гэж ялгахгүй сонгож болохгүй хүмүүсийн нэрийг жагсаалтыг гаргах нь тийм ч буруу зүйл биш. Харамсалтай нь  МЗХ, А.Мөнхбат энэ жагсаалтыг гаргана гэхээр итгэл алдарч байна. Хэрвээ ийм хүмүүсийн жагсаалтыг МЗХ үнэхээр гаргах юм бол  сонгож болохгүй хүмүүийн нэрсийн жагсаалтын эхэнд МЗХ-ны Ерөнхийлөгч А.Мөнхбат өөрөө байх ёстой. Тэрээр  хүүхдийн  паркийн газар, оюутан залуучуудад хөдөлмөр эрхлэлт зэрэг  асуудлаар “занималдаж”, төсвийн 600.0 сяа төгрөгийн төсөл хэрэгжүүлсэн нэгэн. Юуны өмнө олон нийтэлд ил болсон 600.0 саяынхаа тайлан мэдээллийг нийтэд ил болгох хэрэгтэй. Хэрэв ингэж чадахгүй бол А.Мөнхбат төсвийн мөнгө хөрөнгийг шамшигдуулж, хувьдаа  завьшдаг төрийн дээд дунд шатны түшмэдээс ялгарахгүй нэгэн болно. Ийм хүнд ард иргэд итгэл үзүүлэх хэрэггүй биз. Тиймээс МЗХ-ны Ерөнхийлөгч А.Мөнхбат МЗХ-аас гаргаж байгаа 2016 оны сонгуульд сонгож болохгүй хүмүүсийн нэрсийн  жагсаалтанд өөрөө  зүй ёсоор орох учиртай.

Ц.Мөнх