З.Энхболд: АН шантаажчингуудаар дутахгүй

УИХ-ын дарга З.Энхболд зарим хэвлэлийнхэнтэй “зангиагүй уулзалт” хийж, цаг үеийн асуудлаар ярилцсан байна. Тэрбээр Тавантолгой, Сонгуулийн нэгдсэн хууль зэрэг олон асуудлаар ярьснаас гадна намынхаа дотоод уур амьсгалын талаар мөн дурьджээ.

УИХ-ын дарга, АН-ын дарга З.Энхболдын хувьд АН фракцийн бодлогоос татгалзсан, АН шантаажчингуудаар дутахгүй гэдгийг хэлсэн нь анхаарал татав.

АН дотроо фракцитай байна гэдэг нь жинхэнэ утгаараа нам дотроо ардчиллыг бий болгож чадаж байна. Намынхаа удирдлагуудыг шүүмжилж, тэдний алдаа, оноог ярилцаж, фракциа ил тод зарлаж байгаа нь АН-ын бусад намаас ялгарах тал ч гэж хэлдэг байв.

Харин өнөөдөр ингэж фракци болж талцах нь намын дотоод хагарлыг бий болгож, албан тушаал, эрх мэдлийн төлөөх тэмцэл рүү хөтлөөд буйг тэд ойлгосон бололтой, фракцигүй АН-ыг бий болгож ажиллахаа намын даргаас нь авахуулаад мэдэгдээд эхэлсэн нь учиртай.

Түүнчлэн АН-ын даргын хувьд тэрбээр АН-аас гарч л байдаг, орж л байдаг шантаажчин гишүүдээр дутахгүй гэв. Энэ бол УИХ-ын гишүүн Л.Гүндалайд хэлсэн үг биз ээ. Л.Гүндалайгийн хувьд “Ард түмнээ хайрлая” нэртэй шинэ нам байгуулсан. Тэрбээр өмнө нь мөн л нам байгуулж, АН-аас гарч байсан юм. Гэсэн ч буцаад л намаа сонгож, Эрүүл мэндийн сайдаар хүртэл томилогдон ажиллаж байсан удаатай. АН-ын дарга З.Энхболд Л.Гүндалай шиг хүнээр дутахгүй гэв. Түүний талаар хэлэхдээ “Л.Гүндалай шиг хүнээр Ардчилсан нам дутахгүй. Гүндалай бол сайд болгоогүй учраас Ардчилсан намаас гарсан шүү дээ. Намайг сайд болгооч гэж над дээр орж ирсэн. Хэрэв шинэ засагтаа сайд болгохгүй бол гараад нам байгууллаа гэсэн. Би чамайг сайд болгож чадахгүй, намаасаа гарна уу, байна уу, өөрөө мэд гэж хэлсэн. Ийм шантаажчингуудаар Ардчилсан нам дутахгүй ээ” хэмээжээ.

Ийнхүү АН фракцигүй, шантаажчин гишүүдгүйгээр ирэх сонгуулийг угтах гэнэ. Ийм байдлаар олон жил явчихсан тус намын гишүүдийн хувьд З.Энхболдын энэ арга барилыг хүлээн зөвшөөрч чадах болов уу. Аль эсвэл Л.Гүндалай шиг шинэ нам байгуулаад гараад явчих юм болов уу.

Ц.Цацрал

Эх сурвалж: Zaluu.com