Айлчлал ард иргэдэд арай л хүнд туслаа
Энэтхэгийн анхны эмэгтэй Ерөнхийлөгч Пратибха Девисингх Патилын айлчлал өнгөрсөн бямба гарагт өндөрлөлөө. Энэ айлчлал манай улсад нэлээдгүй чухал бөгөөд эдийн засаг, батлан хамгаалахын салбарт хамтран ажиллах зэрэг өндөр ач холбогдолтой ажээ. Гэвч энэхүү айлчлал нь ард иргэдэд нэлээд хүндрэл учруулсан юм. Учир нь Энэтхэгийн Ерөнхийлөгч, эрхэмсэг хатагтай Пратибха Девисингх Патилыг айлчилсантай холбогдуулан “Монгол шилтгээн” амралтын баазад бэсрэг наадам зохион байгуулсан. Энэ үед Гачуурт хүртэлх зам дагуу баахан халууцаж ядарсан цагдаа болон хүчний байгууллагынхан эгнэн зогсох аж. Энэ олон цэрэг, цагдаа ч яахав ажил үүрэг нь ийм хойно гэж хэлэх хүн олон байх. Гачуурт тосгон хүртэлх бүхий л зам дагасан цайны газар болон дэлгүүр, хоршоог хааж, үйл ажиллагаа явуулахыг хориглосон байх юм. Энэ юуны учир вэ.
Аль нэгэн улсын төрийн тэргүүн айлчлал хийж байгаа үед ажиллах зөвшөөрлөө аваад амьжиргааны түвшингээ дээшлүүлэх гэж хөдөлмөрлөж буй иргэдийн ажлыг хаадаг нь юуны учир вэ. Хэтэрхий гэхэд дэндүү хэтэрхий туйлшраад байгаа юм биш үү. Хэрвээ манай улсын Ерөнхийлөгчийн айлчлал Энэтхэгт болсон бол ийм зүйл болохгүй л байх. Тэгэхээр манай төрийн бодлого, үйл ажиллагаа хэтэрхий их хүнд сурталтай байх шигээ. Айлчлал гэхээр л ард иргэдийн нуруунд асар их дарамт учруулж болохгүй биздээ. Гачуурт тосгонд үйл ажиллагаа явуулдаг тэр дэлгүүр цайны газрууд хэлмэгдэх биш буруу бодлогын тод гэгч золиос болж байна. Ингэж бизнес эрхлэгчдээ дарамталчихаад яаж бизнес форум зохиодог юм болоо. Өглөө 7 цаг 30 минутанд бүх үйл ажиллагааг нь зогсоосон. Үдээс хойш хоёр цагийн үед үйл ажиллагаагаа хэвийн явуулж эхлэхийг зөвшөөрсөн гэнэ. Хэн хүнгүй л хаа сайгүй бухимдалтай байна. Айлчилж ирсэн хэн нэгний нүднээс дэлгүүр хоршоогоо харуулахгүй нуугаад байх юм бол энэ улс хэзээ хөгжих юм бэ. Зам дагаад шарилж сандайлан хуушуур идэн суух төрийн цагдаа ч хөөрхий. Ажил хийхдээ аливаа нэгний ажлыг үгүйсгээд байх юм бол хэн хүнгүй л айлчлал гэхээр айж цэрвэх байх даа. Юутай ч дараачийн айлчлалаар хийж буй ажлаа хаяад хэд хоног улс нийтээрээ амарч байвал ажил цалгардахгүй л байх. Хэн хэнийхээ ажил амьдралыг бодож бодлогоо зөв хэрэгжүүлмээр л байна шүү.
Э.БАЯСГАЛАН
“Улс төрийн тойм” сонин
URL:
