Гурван сартай охиноо гудамжинд хаясан эцэг, эхэд ял онооно

Баянгол дүүргийн XX хорооны нутаг дэвсгэр буюу хорооллын эцсийн гэр хорооллын гудамжнаас энэ сарын 17-нд шилжих шөнө гурван сартай өлгийтэй хүүхэд олдсон.

Албаныхны мэдээлснээр охины өлгийн дотор өөрийнх нь төрсний гэрчилгээ, эрүүл мэндийн даатгалын дэвтэр зэрэг бичиг баримтыг хийж үлдээсэн байжээ. Одоогоор гурван сартай охин З-г Эх, хүүхдийн эрүүл мэндийн үндэсний төвд үзүүлэн, хүүхдийн төвд хүлээлгэж өгчээ. Эмнэлгийн үзлэгээр охины биед ямар нэгэн гэмтэл учраагүй болох нь тогтоогдсон байна. Эл хэргийг Баянгол дүүргийн Цагдаагийн I хэлтэст шалгаж байгаа бөгөөд охиноо хаясан эцэг, эхэд эрүүгийн хэрэг үүсгээд байгаа юм. Дашрамд дуулгахад, Эрүүгийн хуулийн 117 дугаар зүйлийн 117.1-т Төрүүлсэн болон үрчлэн авсан хүүхдээ хаясан, төөрүүлсэн бол хөдөлмөрийн хөлсний доод хэмжээг 51-250 дахин нэмэгдүүлсэнтэй тэнцэх хэмжээний төгрөгөөр торгох, 251-300 цаг хүртэлх хугацаагаар албадан ажил хийлгэх, эсхүл 3-6 сар хүртэл хугацаагаар баривчлах ял шийтгэнэ гэж заасан байдаг.