Тавантолгойн хөрөнгө оруулагчид ямар хариу өгөх бол

Тавантолгой хэлэлцээ Хятадын “Чалко” компанид төлөх өртэй холбоотойгоор түр зогсчихоод байгаа. Засгийн газар “Чалко” компанид 150 сая орчим ам.долларын өрийг төлөх үлдээд байгаа юм. Тавантолгойн ажлын хэсгийнхэн ч энэ өрийг хөрөнгө оруулагч тал бүрэн хариуцахаар хэлэлцээрийн явцад тусгаж өгсөн аж. Үүнээс үүдэн хөрөнгө оруулагч тал асуудлыг дотроо хэлэлцэж байна. Тэд ямар хариу өгөх бол. Хөрөнгө оруулагчид Засгийн газрын тавьж буй шаардлагыг хүлээн зөвшөөрөх үү, аль эсвэл шинэ санал оруулж ирэх үү гэдэг нь анхаарал татаж байна.

Хэлэлцээний явцад хөрөнгө оруулагчид “Эрдэнэс Тавантолгой” ХК-ийн иргэн бүрт олгох 1072 ширхэг хувьцааны асуудлыг мөн хариуцахаар тусгасан. Одоогоор хэлэлцээ бүрэн дуусаагүй учир яг ямар байдлаар хариуцаж, иргэд хэзээнээс хувьцааны ногдол ашигаа авах нь тодорхойгүй байгаа юм. Харин Өргөдлийн байнгын хорооны зүгээс “Эрдэнэс Тавантолгой” ХК-ийн 1072 ширхэг хувьцааг Засгийн газарт нэрлэсэн үнээр нь худалдах хүсэлт гаргасан боловч төлбөр нь төлөгдөөгүй тул буцаан эзэмших хүсэлт гаргасан 3375 иргэний асуудлыг шийдвэрлүүлэх тогтоолыг гаргасан байна. Энэхүү тогтоолоор хувьцаа эзэмшигчдийн эрх ашгийг хамгаалах, хувьцааны эдийн засгийн үр өгөөжийг хүртэх боломж бүрдүүлсэн зохицуулалтыг Тавантолгойн Ажлын хэсгийнхэн хэлэлцээний явцад тусгаж өгөх чиглэлийг ч Засгийн газарт өгчээ.