Монголчууд хортой хүнс хэрэглэдэг

Их Британийн “The Daily Mail” сонин, “The Lancet Global health” сэтгүүлээс дэлхийн улс орнуудын хоол ундны талаар өргөн хэмжээний судалгаа явуулжээ. Судалгааны үр дүн олны гайхлыг төрүүлсэн байна. Орон орны амттай хоолыг идэж үзэхээр аялдаг жуулчид олон байдаг. Бельгид шоколад, Унгарт алдарт гуляшийг нь амтлахаар зочилдог хүн олон. Тэгвэл энэ амтат тансаг хоолтой орнууд “Дэлхийн хамгийн хортой хоол” иддэг орнуудын жагсаалтыг тэргүүлсэн байна. Харин өлсгөлөнд нэрвэгдэн, бараг л өвс ургамал гээд л тааралдсанаа иддэг гэж бидний боддог Африк тивийн улсууд хамгийн эрүүл хүнс хэрэглэдэг болж таарчээ. Хар тивд хүмүүс ихэнхдээ биед ашигтай жимс, жимсгэнэ иддэг бол дэлхийн хамгийн баян тансаг улсууд болох Америк, Канад, Баруун Европ, Австрали, Шинэ Зеландын иргэд биед хортой хоол хүнс иддэг нь илэрсэн байна.

Судалгааны баг хүний биед ашигтай 10 гол бүтээгдэхүүн болох жимс, ногоо болон мах, хиам зэрэг хортой 7 бүтээгдэхүүнийг аль улс оронд хэрхэн хэрэглэж байгаа, чанаргүй хүнснээс болж гарч буй өвчин эмгэгийн хэмжээгээр уг чансааг гаргасан байна. Нийт 197 орны 4.5 тэрбум хүн хамрагдсан энэ жагсаалтын “Хамгийн хортой хоол хүнс хэрэглэдэг орны 10 орон”-ы 9 дүгээрт нь манай Монгол Улс бичигдэж, нэгэн сөрөг амжилт тогтоолоо.

Хамгийн эрүүл хүнс хэрэглэдэг 10 орон

1.    Чад
2.    Сьерра-Леон
3.    Мали
4.    Гамби
5.    Уганда
6.    Гана
7.    Кот-д’Ивуар
8.    Сенегал
9.    Израиль
10.    Сомали

Хамгийн хортой хүнс хэрэглэдэг 10 орон

1.    Армен
2.    Унгар
3.    Бельги
4.    Чех
5.    Казахстан
6.    Беларусь
7.    Аргентин
8.    Туркмен
9.    Монгол
10.    Словак