Ц.Элбэгдорж: Монгол түмний маань буян заяа өөдрөг байхын өлзийтэй ерөөлийг өргөн дэвшүүлье

Монгол Улсын Ерөнхийлөгч Ц.Элбэгдорж  Билгийн тооллын XYII жарны хөхөгчин модон хонин жилийн сар шинийн баярыг тохиолдуулан ард түмэндээ хандаж мэндчилгээ дэвшүүлэв.

Тэрээр хэлсэн үгэндээ “Та бүхнийхээ түмэн амгаланг айлтгая. Сар шинэдээ сайхан шинэлж байна уу.
Энэ жил өнтэй сайхан гарч байна. Өвгөн жил улирч, өнтэй жил ирж байна. Энэ жилийн өвөл хаа сайгүй сайхан боллоо. Өнтэй жил гэдэг энэ байх аа.

Монгол  түмэн маань бүл нэмж, бид бүгдээрээ гучин бумуулаа, гурван саяулаа боллоо. Энэ сайхан мэдээг морин жил, хонин жил уулзах энэ үед сонсож хотол олноороо баярлалаа. Монгол түмний маань амны хишиг өөдрөг сайхан байлаа. Тариа ногоо, газар дэлхий маань бидэнд үр өгөөжөө хайрлалаа.

Олон сайхан бүтээн байгуулалтууд бий болж, улс орон маань өнгөтэй өөдтэй сайхан байна.
Хонин жил Монгол түмэнд маань буян хишгээ хайрлаж, Монгол түмний маань буян заяа өөдрөг, аз хийморь нь улам дээшээ байхын өлзийтэй ерөөлийг өргөн дэвшүүлье.

Бүгдээрээ болох бүтэхээс нь дэмжиж, монголчууд монголоо дэмжиж, урагшаа хөгжин дэвжие.
Та бүхэнд сар шинийн мэнд хүргэж, эрүүл энх, сайн сайхан бүхнийг хүсэн ерөөе. Баярлалаа” гэлээ.