Өнгөрсөн шөнө зам тээврийн ноцтой осол болжээ

Өнгөрсөн шөнө дунд буюу 01:40 цагийн үед Нийслэлийн Баянзүрх дүүргийн XI хороо, Баянзүрхийн авто тээврийн шалган нэвтрүүлэх товчоо өнгөрөөд авто зам дээр “Nord benz” загварын том оврын ачааны автомашин “Hyundai Poronter” загварын бага оврын ачааны автомашиныг мөргөн, зам тээврийн осол болж, хоёр хүн хавчуулагдсан зам тээврийн ноцтой осол гарлаа.

Ослын газарт “Hyundai Poronter” автомашин дотор зорчиж явсан 24 настай эрэгтэй О, 18-н настай эмэгтэй Н нарыг автомашины төмөр хийцэд хавчуулагдсан байсныг Аврах ангийн албан хаагчид шуурхай гарган авч, эмнэлгийн байгууллагад хүргэжээ.

Мөн өчигдөр орой 21:40 цагийн үед Нийслэлийн Сонгинохайрхан дүүргийн 29 дүгээр хороо, “Москва” хорооллын III байрны II орцонд тус орцны жижүүрийн өрөөний хөргөгчийг шүршдэг будгаар будсаны улмаас тус орцонд үнэр тархаж, оршин суугчдад химийн бодис үнэртэн, амьсгал боогдох байдал үүссэн байсныг Аврах ангийн албан хаагчид шуурхай арга хэмжээ авч, аюулгүй болгов.

Өнгөрсөн шөнө Сэлэнгэ аймгийн Сүхбаатар сумын V багийн нутагт авто замын хажуугийн хунгар цасанд ”Дархан хүнс” компанийн “Хюндай Портер” загварын ачаатай автомашины зүүн талын дугуйнууд нь хөндийрсөн байдалтай, гарч чадахгүй байсныг тус аймгийн Онцгой байдлын газрын Эрэн хайх, аврах салбарын албан хаагчид татан гаргалаа гэж Онцгой Байдлын Ерөнхий Газрын Гамшгийн Шуурхай Удирдлагын Газраас мэдээллээ.