1072 хувьцаа амилах цагаар

“Эрдэнэс Тавантолгой”-н 1072 хувьцаа олны анхаарлын төвд байна. Учир нь өнгөрсөн долоо хоногийн баасан, бямба гаригт болсон Монголын хөрөнгийн биржийн нээлттэй өдөрлөгт цугларсан хүмүүсийн дийлэнх нь “Эх орны хишиг” 1072 хувьцааны талаар сонирхож байв. Үнэт цаасны төлбөр тооцоо төвлөрсөн хадгаламжийн төвөөс хувьцаагаа нэрийн дансандаа байгаа эсэхийг шалгуулахыг хүссэн иргэд мэдээллээ авч чадалгүй хоосон хана мөргөөд буцах энүүхэнд. Өөрөөр хэлбэл, монгол хүн бүр хувьцаа эзэмшигч болсон, дансанд нь байршсан гэх Засгийн газрын мэдээлэл бодит байдалд ийн замхарчээ. “Эрдэнэс Тавантолгой” компанийн гүйцэтгэх захирал Я.Батсуурь “1072 хувьцаа иргэдийн нэрийн дансанд бий. Үнэн хэрэгтээ хувьцааны үнэлгээ болон бүртгэл, албажуулах ажлыг гүй­цэт­гэж амжаагүй байна” гэж хэлж байсан юм. Харин алба­жуу­лахын тулд хэр их хуга­цаа хэрэгтэй болохыг хэн ч хэлсэнгүй. Учир нь 2010 онд Улсын Их Хурал 39 дүгээр тогтоолоор хувь­цаа эзэмших эрхийг батал­гаажуулсан. 2012 онд нэгж хувьцааны нэр­лэсэн үнэ 933 төгрөг бай­хаар Засгийн газраас тог­тоол гарч байлаа. Ха­рам­­салтай нь өдийг хүр­­тэл албажаагүй хувь­цааны хувь заяа хүмүүст хүлээлт үүсгэсэн нь энэ.

Үнэн хэрэгтээ “Та­ван­толгой” төсөл тав дахь жилдээ явж бай­гаа уралдаант шалгаруулалт. Энэ хуга­цаанд монголчууд төмөр замын талаар хангалттай улстөржсөн хэмээн Монгол Улсын сайд М.Энхсайхан хэлсэн юм. Хэрэв ард түмэн хувьцаагаа авах гэж буй бол уг төслийг урагш нь явуулах хэрэгтэйг ч сануулсан. Албажаагүй агаарын тоог хүмүүсийн тархинд байгаа мэтээр бат суулгаж чадсан. Гэвч энэхүү хоосон тоог “Эрдэнэс тавантолгой”-н хувь заяа эерэгээр шийдэгдвэл хонгилын үзүүрт гэрэл гийх нь тэр гэдэг тархи угаалтаар үргэлжлүүлсээр байна. Түүгээр ч үл барам хувьцааныхаа үнийг дахиж харах шаардлага зайлшгүй гарч байгааг албаны хүн дуулгаж байлаа. Яагаад гэвэл 2012 оны сонгуулиас өмнө нэгж хувьцааг 933 төгрөгөөр тогтсон нь улстөржсөн үнэ гэж харж буй аж. Ийнхүү горьдлого тээсэн хүмүүс 1072 хувьцааны хувь заяа хэрхэхийг харж сууна. Харин уг төслийн багийнхны хөтөлдөг вэб хуудаст “Тавантолгойн хэлэлцээр харьцангуй гайгүй яваа. Улстөрчид нь өөр хоорондоо хардаж сэрдэж, улс төрийн хэрүүлд татаж оруулаад энэ төслөө хагалаад хаячихгүй бол явах учиртай” хэмээн М.Энхсайханы хэлсэн үг тэмдэглээстэй байх юм. Тэгэхээр уг төслийн хувь заяа улстөрчдөөс шалтгаалах нь. Түүнчлэн “Эрдэнэс Тавантолгой” компанийн 20 хувийг ард түмэн хувьцаа хэлбэрээр эзэмшиж буй гэх боловч УИХ-ын шийдвэрт өөрчлөлт орохоос нааш уг хувьцааг амилуулахад хэцүү хэмээн Монгол Улсын сайд хэлжээ. Гэхдээ хэлэлцээр сайн явбал 1072 хувьцааг амилуулах санхүүгийн бололцоо бүрдэнэ хэмээн тэрээр онцолсон байна.

Үнэндээ бид гартаа модгүй хөзрөөр тоглосоор буйгаа хүлээн зөвшөө­рөхгүй байгаа юм. Магадгүй ирэх жилийн сонгуулиас өмнө “Түз” ат­гачих болов уу гэх найд­лага тээсээр байгаа гэхэд ч хилсдэхгүй биз. Тиймээс тодорхойгүй хувь заяаг хааш нь эргүүлэхийг шинэ хөрөнгө оруулагчдын хэлэлцээрийн шийдвэр тодорхойлох болж байна. Магадгүй хэний ч халаа­санд байхгүй хувьцааг илбийн юм шиг гаргаад ирэх ч юм бил үү. Харж л байя.

Д.ОЮУНЧИМЭГ

Эх сурвалж: “Зууны мэдээ” сонин