Йордан улс Исламын улс бүлэглэлээс цуст өшөө авлаа

Исламын улс бүлэглэл Йорданы нисгэгчийг амьдаар нь шатааж буй бичлэгийг цацсан юм. Энэ хэргийн дараа тус улсын улс нисгэгчийнхээ өшөөг авч, Исламын улс бүлэглэлийн хүссэн хоригдол эмэгтэй Сажида аль-Ришави болон аль-Кайда бүлэглэлтэй холбоотой өөр нэг хоригдлыг цаазаар авсан байна.

Исламын улс бүлэглэл Йорданы нисгэгч аль-Касасбиг амьдаар нь шатааж буй бичлэгийг мягмар гарагт “Twitter”-т жиргэсэн. Энэ хэргийн дараа Йорданы хаан Абдулла “Исламын улс бүлэглэлийн гарт амь насаа алдсан нисгэгчийн өшөөг авах ёстой” хэмээн хэлээд “Исламын улс бүлэглэлийн эсрэг хүчтэй тэмцэнэ” гэж амласан юм. Тэрбээр өчигдөр мэдэгдэлдээ “Бидний хайрт хүү аль-Касасбигийн цус дэмий урсах ёсгүй. Түүнд тохиолдсон явдлын дараа манай улс Исламын улс бүлэглэлээс өшөө авсан” гэв.

Тодруулбал, Йордан улс нисгэгчийнхээ өшөөг авч, Исламын улс бүлэглэлийн хүссэн хоригдол эмэгтэй Сажида аль-Ришавиг,  аль-Кайда бүлэглэлтэй холбоотой Зияад Карболи гэх хоригдлын хамтаар цаазаар авсан байна. Сажида аль-Ришави болон аль-Кайда бүлэглэлтэй холбоотой Зияад Карболи нар хоёул Иракийн иргэн бөгөөд тэднийг лхагва гарагт орон нутгийн цагаар 04:00 цагт дүүжилж хөнөөсөн байна. Сажида аль-Ришави бол 2005 онд Амманд 60 хүний амь насанд хүрсэн дэлбэрэлтэд буруутгагдан шоронд хоригдсон эмэгтэй юм. Харин Зияад Карболи нь 2008 онд Иорданы үндэстнийг хөнөөснийхөө дараа шоронд хоригдсон.

Йорданы Засгийн газрын төлөөлөгч “Исламын улс бүлэглэлийг газрын хөрснөөс арчиж хаяхын тулд АНУ тэргүүтэй эвслийн хамтын хүчин чармайлт нэн шаардлагатай” хэмээн хэлжээ. Тус бүлэглэлийн гарт амь насаа алдсан нисгэгч аль-Касасби өнгөрсөн арванхоёрдугаар сард Исламын улс бүлэглэлийн эсрэг агаараас цохилт үзүүлэх ажиллагаанд оролцож, Сирийн Ракка хотын ойролцоо газардах үедээ хэт даврагчдад баригдсан байдаг. Йордан улс нисгэгчээ аврахын тулд Исламын улс бүлэглэлийн хүсэлтийг биелүүлж хоригдол солилцохоор зөвшилцсөн ч үр дүнд хүрч чадаагүй юм.