“ГОЛОМТ” БАНКНЫ ЗАХИРАЛ Д.БАЯСГАЛАН БОДЬ НЭРЭНД ШУНАЖ ЭЦЭСТ НЬ БАЙНД ҮГҮЙ БАНЗАНД ҮГҮЙ ХОЦОРЛОО

Ардчилсан хувьсгалтай хамт өлгийдөж авсан Монголын ууган хувийн компаний нэг “Бодь групп”-ыг дагасан хэл ам хэрүүл одоо хүртэл тасраагүй л байна.

Маргааны эхлэл нь Бодь группын харьяа “Голомт” банкны санхүүгийн хямралтай холбоотойгоор хувьцаа эзэмшигч гурван тал өөрийн хөрөнгүүдийг эргүүлэн татсан. Ийн эргүүлэн татахдаа УИХ-ын гишүүн Л.Болд “Бодь” цамхаг болон “Бодь” даатгалаа авсан байна. Учир нь “Бодь” гэх нэрийг түүний аав эрдэмтэн Лувсанвандан анх өгч байжээ. Харин бусад хувь эзэмшигч нар болох УИХ-ын гишүүн М.Зоригт, “Голомт” банкны ТУЗ-ийн дарга Д.Баясгалан нар “Голомт” банкыг хамтран эзэмшихээр болсон байна.

Үүний дараагаар “Бодь групп” ХХК гэдэг компанийг Л.Болдхуяг, Л.Болд нар эзэмшихээр улсын бүртгэлд бүртгүүлээд байсныг эсэргүүцэн анх шүүхэд гомдол гаргасан байдаг. Тэрчлэн иргэн Д.Баясгалан яг энэ нэрээр буюу “Бодь групп” ХХК-ийг нэртэй компанийг Улсын бүртгэлд бүртгүүлэхээр давхар хүсэлт гаргаснаар маргаан эхэлжээ.

Харин улсын бүртгэл дээр “Бодь” нэр авч үлдэх вэ гэдэг дээр л маргааны анхан эх үүсвэр үүссэн гэж эх сурвалжууд ам нэгтэй дуугардаг.

Ийнхүү анх өнгөрсөн оны 9 сараас эхлэн 3 шатны шүүхээр давж заалдан маргасны эцэст хоёр тал аль аль нь ёстой л байнд ч үгүй банзанд ч үгүй гэдгийн үлгэрээр “Бодь” хэмээх нэрийг эзэмшихийг дээд шатны шүүхээс хориглосон шийдвэр гаргасан байна.

Гэтэл анх Л.Болд, Л.Болдхуяг нарын аав С.Лувсанвандан гэдэг хүн анх 1989 онд “Бодь хоршоо” нэртэй бүрэн бус хариуцлагатай компанийг байгуулан оёдлын цех, жижиг дэлгүүр зэргийг ажиллуулж эхэлсний үндэс суурин дээр “Бодь” ХХК үүсч, улмаар түүний хүү Л.Болд 1996 онд “Бодь” ХХК-ийг төлөөлж иргэн Д.Баясгалан, иргэн М.Зоригт нартай хамтран “Бодь интернэшнл” ХХК-ийг үүсгэн байгуулжээ. Ингэхдээ “иргэн Л.Болд” гэдгээр бус, харин “Бодь ХХК-ийг төлөөлж Л.Болд” гэдгээр компани үүсгэн байгуулах шийдвэр, гэрээнд гарын үсэг зурж оролцсон байдаг. Эдгээр баримт бичгүүдэд тусгасан хамгийн гол асуудал нь “Бодь”  гэдэг нэр оролцуулж хараат болон охин компаниуд байгуулахыг үүсгэн байгуулагч “Бодь” ХХК зөвшөөрсөн байдаг. Хууль эрхзүйн холбогдох бичиг баримт талаас “Бодь” нэрээр дахиад компани байгуулах эрх нь “Бодь” ХХК-д буюу Л.Болд нарт байгаа гэж харагдаж байгаа юм.

Ийнхүү “эхийг нь эцээхгүй тугалыг нь тураахгүй” гэсэн бөөрөнхий арга буюу “Бодь” нэрийн маргааныг тасалснаар иргэн Л.Болдхуяг “Бодь групп”-ын эрхийг цуцлах хийгээд өмнөх шатны шүүхийн гаргасан шийдвэр болох иргэн Д.Баясгалангийн “Бодь групп-ын эрхийн бичгийг хүчингүй болгосон нь ажээ.

Хоёр жилийн хугацаанд хэрүүлийн алим хуваалцсан хоёр талын аль аль нь “Бодь” хэмээх нэрийг ашиглах эрхгүй болсон нь анх ааваасаа өвөлж авсан Л.Болдхуяг болон УИХ-ын гишүүн Л.Болд нарын хувьд харамсалтай явдал болсон ч тэд саяхан хэвлэлийнхэнд дахин “Бодь” нэрийг шүүхийн шийдвэрийг хүндэтгэн хэрэглэхгүй болсноо мэдэгдсэн.

Харин “Голомт” банкны захирал Д.Баясгалангийн хувьд ард түмний дунд танил болсон “Бодь” нэрэнд шунасан сэтгэлийг нь шүүхийг уг шийдвэр хазаарласан явдал болсноор уг хэрэг дуусаж байгаа ажээ. Нэгэнт хэрэг иймээр эргэсэн болохоор Д.Баясгалангийн хувьд “Бодь” нэр тийм ч чухал биш болсон болов уу. Учир нь олон нийтэд таагүй сэтгэгдэл үлдээсэн уг маргааны эцэст дахин ийм нэрийг ашиглах нь бизнест лав таатай нөхцөл бүрдүүлэхгүй гэдгийг сэтгэлийн угтаа гадарлаж байгаа байлгүй.

Эх сурвалж WWW.BOLOD.MN

ЧОЙ