Коби Брайнт цорын ганц рекорд тогтоов

“Лос Анжелас Лэйкерс” баг өөрсдийн ‘Стэйплес Центр’-тээ Дорнод бүсийн тэргүүн баг Торонто Рэпторсыг хүлээн авч, нэмэлт цагт 129-122 оор буулган авснаар энэ улирлын дөрөв дэх хожлоо авлаа. Энэ өдөр “Лэйкерс”-ийн супер од Коби энэ тоглолтонд 31 оноо, 12 оновчтой дамжуулалт, 11 самбар гүйцэтгэж, карьерийнхаа 20 дахь трибл-даблыг хийж багийн нөхдөө тэргүүлсэн бол Ник Янг 20 оноо, Карлос Бузер 18 оноо, Жордан Хилл 16 оноог тус тус авч багийнхаа ялалтанд хувь нэмэр оруулжээ.

Энэ тоглолтонд Лэйкерсийн домог Коби Брайант NBA-гийн түүхэнд 30,000 оноо авч, 6,000 оновчтой дамжуулалт өгсөн цорын ганц тоглогч болсон байна.

Трибл-дабл хийсэн талаараа Коби Брайнт : ” Би зүгээр л зөв тоглолтууд гаргахыг зорьсон. Залуус маань шидэлтүүдээ оновчтой болговол миний ажил илүү хялбар болж байгаа нь л ялгаатай. Яагаад гэвэл би довтолгоонд хүчлэх шаардлагагүй болчихно. Харин тэд шидэлтээ алдаад манайх 12-15 оноогоор хожигдоод ирвэл би арай илүү хүчилсэн тоглолт харуулах хэрэгтэй болдог.”

Карлос Бузер : ” Коби өнөөдөр гайхалтай байлаа. Самбараас бөмбөг авч шидэхийн зэрэгцээ гайхалтай найруулагч байлаа шүү дээ. Коби ингээд тогловол бид бүгд л тоглолтонд оролцоно. Үдэш бүр Коби гайхалтай байдаг л даа. Гэхдээ өнөөдөр илүү онцгой байлаа.”