ИЛ ЗАХИДАЛ
ЭРХЭМ ХҮНДЭТ МОНГОЛ УЛСЫН ИХ ХУРЛЫН ДАРГА З.ЭНХБОЛД, МОНГОЛ УЛСЫН ИХ ХУРЛЫН ГИШҮҮД ТАНАА
Дэлхийн зах зээл дээрх уул уурхайн бүтээгдэхүүний үнийн бууралт болон эрэлтийн уналтаас үүдэн Монгол Улсын эдийн засгийн бодит өсөлт 2012 оноос эхлэн эрс буурч 2013 онд 11.7% улмаар 2014 онд “нэг оронтой” байхаар хүлээгдэж, гадаад худалдаа, гадаадын хөрөнгө оруулалт, бодит үйлдвэрлэлийн хэмжээ буурч байгаа нь эдийн засгийн хөдөлгүүр болсон уул уурхайн салбарын үйл ажиллагаанд хүндээр тусч улс орны эдийн засаг хямралын байдалд хүрээд байна.
Ийм нөхцөл байдлын үед 2014 оны эхнээс өнөөдрийг хүртэл алт олборлогчид 11.5 тонн буюу 450 сая ам.долларыг улсынхаа Эрдэнэсийн санд тушааж, том амалж, хэлсэн амлалтандаа хүрлээ.
Геологи хайгуулын болон уул уурхайн олборлолтын үйл ажиллагаанд саад хийж байгаа иргэний нийгэм, байгаль орчныг хамгаалах нэртэй зарим иргэд, төрийн бус байгууллага, “Шантааж хийгчид”, нөхөн олговороор баяжихыг санаархагчдын үйл ажиллагаа хэрээс хэтэрч хуулийн хүрээнд үйл ажиллагаа явуулж буй БАЯЛАГ БҮТЭЭГЧ, татварын орлогыг голлон бүрдүүлж байгаа уул уурхайн компаниудын үйл ажиллагаанд ноцтойгоор хохирол учруулж байна.
Дэлхийн зах зэап, гадаад орчны нөлөөгөөр уул уурхайн бүтээгдэхүүний гадаад зах зээлийн эрэлт 2015-2017 онд сэргэх хандлага байхгүй байгаа нь дээрх хямралт байдал улам нэмэгдэн цаашлаад нийгэм, улс төрийн хямралд нэрвэгдэж болзошгүй юм.
Иймд Монгол Улсын нийгэмд үүсээд буй эдийн засгийн тулгуур салбар болох уул уурхайн салбарын эсрэг аливаа гадаад, дотоодын турхирагч, популист “эх орончид”, өдөөн хатгагч этгээдүүдэд Монгол Улсын хууль, журмын хүрээнд ажиллах, бизнесийн аливаа үйл ажиллагаанд саад тотгор хийхгүй байхад Улсын Их Хурлаас онцгой анхаарлаа хандуулж , “Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх ашиглахыг хориглох тухай хууль”-ийн дагаж мөрдөх журмыг өөрчлөх тухай хуулийг УИХ-ын энэ намрын чуулганаар баталж өгөхийг хүсэж байна.
Дээрх хуулийн үйлчлэлд нийт 150 гаруй компанийн 210 орчим лиценз хамаарагдаж (Монгол Улсын нийт 1300 гаруй багийн, нэг багийн нутаг дэвсгэрийн талаас ч бага талбайг хамарч байгаа), нийт 130 тонн алтны нөөц буюу Монгол Улсын Эрдэнэсийн санд тав орчим тэрбум ам.доллар орж ирэх бүрэн бололцоотой юм.
Уг хуулийг баталснаар орхигдсон байгаль орчныг нөхөн сэргээж, байгаль орчныг сүйтгэж байгаа үйл ажиллагааг таслан зогсоож, Засгийн газар нөхөн төлбөрийн өрнөөс чөлөөлөгдөж, Улс орны эдийн засаг, нийгмийн олон асуудлыг огцом, эерэгээр шийдвэрлэх бодитой боломж байгааг ойлгож анхаарлаа хандуулна уу.
М0НГ0ЛЫН АЛТ ҮЙЛДВЭРЛЭГЧДИЙН ХОЛБОО
URL:
