Донецкт сургуулийн хүүхдүүд буудалтад өртжээ

Н.МӨНХЖИН

Украины Донецк хот дахь 63 дугаар сургуулийн хөлбөмбөгийн талбай буудалтад өртөж хоёр хүүхэд амиа алджээ. Гурван хүүхэд гэмтэж эмнэлэгт хүргэгдээд бай­на. Сургуулийн хүүх­дүүд амиа алдсаныг тус сургуулийн Хүмүүн­лэгийн штабын зохицуу­лагч Римм Филл ВВС-д бат­лан ярьжээ. Хүүхдүүд өд­рийн хоолны дараа хөл­бөмбөг тоглож бай­хад талбай дээр сум унаж дэлбэрчээ. Уг сур­гууль нь салан тус­гаар­лагчид болон Ук­раины армийнхан тулал­даан өрнүүлсээр бай­гаа Донецкийн нисэх бууд­лаас холгүй оршдог ажээ.

Украины Гадаад хэргийн яамны тэргүүн Павел Климкин Европын холбоонд хандаж ажиглагчдыг Донецк дахь сургуулийн хөлбөмбөгийн талбай руу илгээхийг уриалжээ. “Европын холбооны аюулгүй байдлын ерөнхий нарийн бичгийн дарга Ламберто Заньер болон тус байгууллагын Украин дахь тусгай монито­рингийн ал­баны тэргүүн Эртугул Алакантай уулзалт хийж байхад Донецкаас аймшигтай мэдээ ирлээ. Европын холбооны аюулгүй байдлын ажиглагчдыг хэргийн газар илгээх хү­сэл­тээ гаргасан. Хэр­гийн халуун мөрөөр орж, буруутнуудыг олж шийт­гэх хэрэгтэй” хэмээн Климкин “Твиттер” хуудсаараа дамжуулан мэдэгдсэн байна.

“Өчигдрийн байдлаар Донецкт маш хурцадмал байдал үүсчээ. Өдрийн турш хотод буудалт, дэлбэрэлтийн дуу тасарсангүй. Тухайлбал, Петровск, Киевск, Куйбышевск дүүрэгт байдал нэн түгшүүртэй байна” хэмээн Донецк хотын зөвлөлөөс мэдээлэв. 63 дугаар сургуулийг эрх­лэн ажиллуулдаг бай­гууллагын эзэн, биз­нес­мэн Ринат Ахметов дайн байлдааны ажиллагааг зогсоохыг уриалж, сэтгэл хөдөлгө­сөн мэдэгдэл хийжээ. “Энэ дайныг зог­соохын тулд хэдэн хүүхэд амиа алдаж, хэдэн хүн үхэж, шархдаж, хэчнээн их нулимс урсах ёстойг надад хэлээтэх!? Бүгд галаа зогсоохыг уриалж байна. Энгийн иргэдийг алж, хядахаа зогсоо. Хүүхдүүдийг алахаа зогсоо!” хэмээн украин бизнесмэн байлдагч талуудад хандан хэлжээ.

Донецк дахь буудалцааны үеэр сургуулийн хүүхдүүд амиа алдсан нь мөргөлдөөнд оролцогч талууд иргэний, энгийн иргэдийг хамгаалах үүрэг, хариуцлагаа зөрчиж буйн нотолгоо болж байна хэмээн Amnesty International байгууллагын Европ, Төв Ази дахь хөтөлбөрийн удирдагч Денис Кривошеев онцолсон байна. Хүний эрхийг хамгаалагч Amnesty International байгууллага энэхүү эмгэнэлт явдлыг даруй мөрдөн шалгахыг уриалав.

Эх сурвалж: “Зууны мэдээ” сонин