М.Уранцэцэг Их дуулгын аварга болов

Азербайжан улсын нийслэл Баку хотноо жүдо бөхийн Их дуулга тэмцээний эхний өдөр дэлхийн аварга М.Уранцэцэг 48 кг-д аваргын алтан медаль хүртэж Монголын тамирчдын медалийн салхийг хагаллаа.

“Баку-2014” Их дуулга тэмцээнд 41 орны эрэгтэй 157, эмэгтэй 90 тамирчин өрсөлдөж байна. Манай улсаас энэхүү тэмцээнд долоон тамирчин оролцож байгаа юм. Манай эмэгтэй жүдочдоос 48 кг-д хүч үзсэн Дэлхийн аварга, гавьяат тамирчин, М.Уранцэцэг Бакугийн дэвжээнд урамтай сайхан барилдаж түрүүллээ. Тэрбээр учраа бүхнээ төвөггүй шороодуулсаар Их дуулгын алтан медалийн эзэн болж, Монгол Улсынхаа төрийн далбаагаа Бакугийн тэнгэрт мандуулан төрийн  дууллаа эгшиглүүлэв.