Тэнхлүүн цагийн есөн эрүү

Бялуун дээрээ 375 ширхэг лаа асааж энэ тэр, хүслээ шивнэж үлээгээгүй ч гэсэн  Нийслэл аниагийн төрсөн өдөр нижгэр болж, “Явган парад”-ыг “Эргэн дурсахуй”-д оруулж, хэн хүнгүй сэтгэл нь огшин, ёстой “балайг нь авч” байхад за энэ чинь яасан ч ёозгүй зураг оруулчихав даа. Дүүрсэн хэрэг. Одоо хүлцэл гуйгаад ч оройтсон. Уучлаарай гэдэг үгийг тэгж үнэгүйдүүлээд юүхэв, зүгээр. Дуугүй л байя.

Аа тийм. Энэ зураг уу? Энэ уг нь зуугаадхан жилийн тэртээх Монголын түүхийн шорвог үнэний л нэгээхэн хэсэг…

“Биеийн боолчлол”-ын үед өвдөлт гэдгийг яс маханд нь ойлгуулдаг эрүү шүүлт ноёрхож байсан гэнэ билээ. Жаахан ч эрх чөлөөгүй дарлал мөлжлөгийн эринд юм бүхэн манжаас хараат байсан гэсэн байх шүү, нээрээ. Талхидах, банздах, төөнөх, шаахайдах, шахаанд оруулах, хулс шаах, туйпуу сугалах, мөглөнд хорих, хонгор азаргат хүлэх гээд 9 эрүүгээр, юу юу гэнэ вэ зөндөө л тамладаг байсан юм байх, базарваань…

Ядаж байхад 5DW нь түүх сөхөхдөө муу, муу! Тиймээс эрх чөлөө нь дэндсэн ард иргэд минь манжийн үеэс ч дутахааргүй харгис эрүү шүүлтийг “сайн дураараа” эдэлж, “сэтгэхүйн боолчлолд” хатаад байгаа өнөөгийн бийлэг цагийн өнгийг л шинжмой…

ЗЭЭЛИЙН ХЭНЭЭ

“Үгүй ер өө, хүнийг хөгширсөн гэж бодож болдоггүй юм байна. Цэрмаа, Цэрмаа л гээд байсан Цэрмааг чинь харлаа.” ”Өнөр бүл” киноны туслах дүрийн хэлсэн хөөрхөн үг шиг ярихад нээрээ энэ боолын нийгмийг чинь нурж унасан гэж бодож болдоггүй юм байна.

Гуя шилбийнх нь хооронд хөндлөн мод хийчихээд талхидах биш, нийгмийн давхарга бүрийн хүмүүсийг дэлхийн санхүүгийн стандартанд боогдуулж, материаллаг шуналд баглаж, өөрсдөөр нь зөвшөөрүүлсэн өрийн дөнгөнд хийж, хүү гэдэг шимэгч хорхойгоор дамжуулан хөдөлмөрийг нь “үнэгүй” мөлжиж байна. Айл бүхэн зээлийн хэнээ тусч, лизингээс лизингийн хооронд сэтгэл санааны дарамт гэдэг мөнхийн колонид байна…

ХАСЫН ХЭНЭЭ

Савангийн дууриас илүү гарч тархиа цэнэглэж үзээгүй, “ая-гү”-гээс ахиухан гадаад үгний запасгүй эмс охид маань өөрсдийгөө банздахаас аймаар эрүү шүүлтийн өмнө нүв нүцгэн аваачдаг юм байна. Зоос л төлж байвал дотор гадныг ялгалгүй, хөгшин залууг гололгүй, суганы үнэр амны бохир нь хамааралгүй, суудал гүйдлийн зиндаагүй янхандалт хэмээх хасын донгоосоо болж яасан ч их дарлагддаг юм бэ. Харалган тэдний эрх чөлөө, харийн эрийн чалхны аясаар хумигдана…

МЭС ЗАСЛЫН ХЭНЭЭ

Нүд байдаг газраа нүд оёулж, хамар байдаг газраа хамар сүндэрлүүлж, хэвлийн махаа шулуулж, ташаан ясаа зоруулж, эрүүгээ өөлүүлж, сүү саамшдаг энгэртээ силикон чихүүлж гоо сайхны төлөөх даанч муухай энэ яргачлалыг санаанд багтахгүй их мөнгөөр амсдаг сайн дурын боолын орчлонг оюуны ядуурал төөнөнө.

ОД БОЛОХ ХЭНЭЭ

Өөрсдөө лааны дөлийн дайтай ч гэрэлтэхгүй хэрнээ тэнгэрийн одыг ч “ажилгүй болгочих” гээд үзчихдэг нийгмийн салбар бүрийн оддын хэнээ цагаандаа гарч, од болохын тулд  энэ нийгмийн бүхий л бузар булай доогуур шургана.  Орчин цагийн шахаа гэж…

АЛБАН ТУШААЛЫН ХЭНЭЭ

“Тэртээх өндөр дээр гараарай. Үүлэн дээр нисээрэй” гэж хөөрөгдсөөр залардаг сэнтийнхээ “суудал өнцөгдөх”-ийг тооцолгүй албан тушаалын төлөөх улайрал гэгч модерн боолчлолын бас нэгэн эрүүдэлт. Давхарлаж өрсөн тоосгон дээр зогсоогоод эрхий хуруунаас нь дүүжлээд доор нь байгаа туйпууг нэг нэгээр нь аажуухан сугалж тамладаг манжийн эрүүгийн хажууд энэ дарлал их цэвэрхэн. Магтана, мацуулна. Нэг сэтэр зүүлгээд торгооно. Тэгснээ өлмийд нь бөхийж сууж байгаад л тоосгоо нэг нэгээр нь сугалж гарна. Бүх тоосгоо сугалж дуусахад ярга нэг юм дуусна.

БРЭНДИЙН ХЭНЭЭ

Манай эмээгийн гараар оёсон “шарваар”-аас ялгарахгүй хэдэн цоохор хувцас, хэрэглээгээ дагаад үнээ нэмчихсэн хэдэн дижитал хэрэгсэл төдийхнөө брэнд гэж андуурдаг хүмүүсийн бодол маркетинг гэж хулхи онолд шаахайдуулна. Хү­сэл шуналын колони энэ.

ХАХУУЛИЙН ХЭНЭЭ

АТГ-т л хөрөнгө оруулдаг энэ яргаллын амтанд амархан ордог хүмүүс хэзээ цагт сэтгэлийнх нь хумсны завсар айдсын хулс хатгаастай. 21-р зууны нүүрэн дээр ургасан энэ өмөн үү эдгэх үү?

ИНТЕРНЕТИЙН ХЭНЭЭ

Орой цахилгаан тасарлаа. Гэрийнхэнтэйгээ ярьж үзлээ. Манай гэрийнхэн чинь дажгүй хүмүүс байдаг юм байна шүү дээ” гэсэн тайлбартай зурагт хуудас хэдхэн хормын дотор фейсбүүк дээр 5000 лайк. Гэрийнхэн нь бүгд интернет рүү ороод таг болцгоодог гэсэн үг байх нь тийм үү. “Аалзны тор мэт сүлжээн” дор цаг наргүй суугсдыг энэ цагийн мөглөнд хоригдогсод гэлтэй.

ХҮНИЙ НАЙМААНЫ ХЭНЭЭ 

“Гадаад хүнтэй гэр бүл болоход зуучилна. Бөөрний донор хайж байна. Өндөр цалинтай ажилд авна” гэх зэрэг да­руу­хан зарын дор бүтээг­дэхүүнээ олж нийлүүлдэг энэ бизнес ашгаа хурдан өгдөг. Хүн чанараа гээн байж хүн гэдэг барааг чингэлэгт ачих, дөрвөн хөллүүлж “хонгор азаргат хадах” хоёрын эрин үе өөр бо­ловч эрүүдэн шүүх агаар нэгэн буй.

Махан биеэрээ дарлагдаж байсан ядруу цагт шударга үнэний төлөө 9 эрүү давсан сайн эрийн хуйх сэтгэл цэлмээж ирсэнсэн.

Харин сэтгэл оюуны боолчлолд өөрөө өөрийгөө дөнгөлж суудаг тэнхлүүн өнөө цагт 9 хэнээ тусаад, 9 шидийн эрүү давсан, “Модерн Ард Аюуш” гарч ирээд “Цэцэг нуурын дугуйлан” битгий байгуулчихаасай.

Ч.Өлзийням

Эх сурвалж: “Зууны мэдээ” сонин