АН-ын ҮЗХ-г хуралдуулах шаардлага Монгол улсын өнцөг булан бүрээс ирж байна

Нийслэлийн АН-ын дарга Э.Бат-Үүл эсэргүүцэн мэдэгдэл гаргасан бол Өвөрхангай аймгийн АН-ын гишүүд болон МоАХ-ны салбар зөвлөл энэхүү хамтарч ажиллах гэрээг эсэргүүцсэн мэдэгдэл ирүүлжээ. Завхан, Дархан-Уул аймгийн удирдлагууд ч энэхүү шийдвэрийг эсэргүүцэн мэдэгдэл ирүүлжээ.  Мөн энэ асуудлаар яг одоо Төрийн ордонд АН-ын бүлэг хуралдаж байна.

Өвөрхангай аймгаас ирүүлсэн мэдэгдэлд “2014 оны 10 дугаар сарын 18-ны өдрийн Ардчилсан нам, Монгол Ардын Хувьсгалт Намын хамтын ажиллагааны гэрээний 2 дахь заалт “Ардчилсан нам болон Монгол Ардын хувьсгалт Нам нь 2016 оны УИХ-ын сонгуулийн өмнө нэг эвсэл болж сонгуульд оролцох эсэхээ тухайн үеийн улс төрийн нөхцөл байдлыг харгалзан шийдвэрлэнэ”, 3 дахь заалт Сонгуульд нэг эвсэл болж оролцоогүй тохиолдолд УИХ-ын сонгуулийн мажоритар тойрогт хоёр намын нэр дэвшигчид нэг нэгнийхээ саналыг хуваахгүй байх зарчимд нийцүүлэн хоёр намын сонгуулийн бүхий л үйл ажиллагааг хооронд нь уялдуулан зохицуулах зарчим баримтална” гэсэн заалтууд нь Ардчилсан намын Үндсэн дүрмийн 6.4.9.4, “Төрийн сонгуульд эвсэл байгуулж оролцох эсэхийг хэлэлцэж шийдвэр гаргах” 6.4.9.5, “Ардчилсан намаас бусад улс төрийн намтай байгуулсан хамтын ажиллагааны гэрээг батлах” гэсэн заалт нь Үндэсний Зөвлөлдөх Хорооны бүрэн эрхэд хамаарах асуудлыг Үндэсний Зөвлөлдөх Хорооны шийдвэргүйгээр болон анхан, дунд шатны намын байгууллагын саналыг тусгалгүйгээр энэхүү гэрээг байгуулсныг эсэргүүцэж байгааг үүгээр мэдэгдэж байна” гэжээ.