Ерөнхий сайдын ахлах зөвлөх өлсгөлөн зарлаж эхэллээ

“Нүүрс” хөтөлбөрийн хүрээнд 3.6 тэрбум төгрөг завшсан гэх Ерөнхий сайдын ахлах зөвлөх Л.Гансүх өчигдрөөс эхлэн өлсгөлөн зарлажээ.

Тэрбээр, энэхүү хөтөлбөртэй холбогдуулан маш олон гэм зэмгүй ажилчдыг дуудан байцааж, хэрэгт холбогдуулан шалгаж, баривчилсан асуудлыг эсэргүүцэн өлсгөлөн зарлахаар болсон аж. Мөн түүнтэй хамт хоригдож байгаа М.Тулга нарын биед хянагчид ямар ч зорилгогүйгээр халдаж, хөл нь мэдээгүй болсон, АТГ-ын албан хаагчид “Нүүрс” хөтөлбөрт хамаатуулан олон хүнийг удаа дараа айлган сүрдүүлж, барьж хорьж байгаа нь Ардчилсан Засгийн газрын үед гарч байгаа хамгийн аймшигтай үзэгдэл боллоо хэмээн УИХ-ын гишүүдэд хандан бичсэн захидалдаа онцолж байсан удаатай.

Түүнийг өлсгөлөн зарласан шалтгааны талаар өмгөөлөгч Ц.Баасандоржоос тодруулахад “Өнөөдрөөс /өчигдрөөс/эхлэн өлсгөлөн зарлаж байгаа нь үнэн. Биеийн байдал нь хэвийн байгаа. Дөнгөж цагийн өмнө Л.Гансүх зөвлөхтэй уулзаад ирлээ.

Өлсгөлөн зарлахаар эргэлт буцалтгүй шийдсэн гэж хэллээ” хэмээлээ. Л.Гансүх нь баригдсан цагаасаа хойш Төв аймгийн хорих ангид саатуулагдаж буй. Өнгөрсөн есдүгээр сард шүүх хурал болсон ч түүнийг үргэлжлүүлэн хорих шийдвэрийг гаргасан бөгөөд энэхүү шийдвэрийн дараа шударга бус үйлдэлтэй өлсгөлөн зарлаж тэмцэхээ илэрхийлээд байсан юм.

Тэрбээр, энэ бүх хууль зөрчсөн, хэлмэгдүүлсэн гэмт үйлдлүүд дуусах хүртэл өлсгөлөн зарлах гэнэ.

Монголын мэдээ