Баарны бизнест “гар дүрсэн” нууцлаг бизнесмэний паян дэлгэгдлээ!

 

Монгол улсын хөгжил цэцэглэлт урагшаа нэг, хойшоо хоёр алхаж байхад зарим нэг салбар цаана чинь “гэрлийн хурдаар” хөгжөөд байна. Энэ бол архи согтууруулах ундаа, шөнийн цэнгээний газрууд. Архи гээч ундааг есөн шид, ерөөл халилтай нь үйлдвэрлээд барахгүй алтаар шүүж,  алмаазаар амтлах нь холгүй хийдэг болсны хажуугаар импортын элдэв төрлийн архи, пиво, вино, виски лангуун дээр эгнэж байна.

За яахав, ууж идэхээ тааруулах эсэх нь уг хүний ухамсрын асуудал байж болох ч хотын хаа сайгүй өнгө өнгийн гэрэл анивчуулан, нүргэлсэн дуу чимээгээрээ залуусыг урин дуудах баар, шөнийн цэнгээний газруудын тоо аль эртнээс л зах замбараагаа алдаж, бүр дээдэс доодсын гэх зэрэг зиндаа хүртэл энд тогтсон.

Ёстой ханаж, хахах цаг нь ирсэн л баймаар юм. Гэтэл саяхан нийслэлд Mint night club  гээч дахин нэг баар мэндэллээ. Хамгийн сонирхолтой нь уг шөнийн клуб олон улсад сүлжээтэй, ундаа  сархад нь бүгд импортынх, ордог үйлчлүүлэгчид нь цөм Зайсан хавийнхан юм байх. Home plaza-гийн дээд давхарт байрлах Mint club-ын цаад эзэн нь хэдэн жилийн өмнөөс монголчуудыг архи, вискигээр “угжих” ажиллагаанд үнэлж баршгүй хувь нэмэр оруулсан Э.Нандинзүрх гээч эрхэм.  Бизнесийнхний дунд CRM-ийн захирал гэхээс илүү гольф сайн тоглодог, гунхсан хүүхнүүдийг урдуураа зүгээр өнгөрүүлдэггүй гэдгээрээ зартай эр гэж байгаа. Үүнийгээ ч нотлох гэсэн шиг мань эр хэдэн сарын өмнө хөтлөгч П.Анужинтай жиг ургуулж, жигтэйхэн “романчигласан” биш экс амрагт нь гардуулаад бөөн хэрэг мандуулсан.

Газар дээрээ гардуулсан хоёрын ачаар Зайсангийн нэг хотхон тэр чигээрээ нойрноос сэрч, цагдаагийнхан дуу, дохио хангинуулж ирээд амьд шоу гээчийг жинхэнэ утгаар нь үзсэн юм билээ.

Саяхныг хүртэл шүүх цагдаагийн үүд сахиж суусан Э.Нандинзүрх гээч энэ “но”-той залуу өмнө нь өөрийнхөө туслахаар ажиллаж байсан бүсгүйтэй олон жил амраглаж, тэдний дундаас хүүхэд төрсөн гэх яриа ч байдаг.

Ёстой нөгөө “бадарчин явсан газар балагтай, батгана суусан газар өттэй” гэгчээр мань эр ажил, амьдралын алин дээр ч холион бантан хутгадаг эр. Эхнэр Онон нь хотын хамгийн үнэтэйд тооцогддог Royal Luxury караокег ажлуулдаг. Э.Нандинзүрх Mint club-ыг нээхдээ нөлөө бүхий хэд хэдэн эрхмүүдтэй хүч хавсарсан гэх. Бүр тодруулбал уг баарны хувь эзэмшигч, хумсаа нуусан муурнуудын нэг нь Нийслэлийн газрын албаны дарга Ц.Сундуй аж. Юун төлөө газрын алба хариуцдаг, хотынхонд бол лус савдаг гэгдэх нь холгүй ховорт тооцогддог дарга билээ, мань эрийн хэтэвч овоо түнтгэр байдаг нь лавтай.

Мөн Mint club-ын ард Э.Анар гэх залуугийн нэр зурайж байна. Home plaza бол олон жилийн өмнөөс МАН-ын дарга М.Энхболдын мэдэлд очсон. Тиймдээ ч хүү нь шөнийн клубыг энд нээж, эзэн хүн шиг аашилсан биз. Газар болоод сархадын наймаагаар тамтаггүй баяжиж, хаана юунд зарцуулахаа олж ядсан ийм хэдэн нөхдүүд хотын залуусыг хөлчүүрүүлэх газар нэгээр нэмснийхээ төлөө хөрөнгөө хэд дахин үржүүлж байгааг сайшаах уу, шүүмжлэх үү.