“Рио Тинто”-гийн Монгол дахь 4.2 тэрбумын төсөл хугацаа алдан намагт шигдсээр байна

Австралийн “Сидней морнинг хэралд” сонинд ийм нийтлэл хэвлэгджээ.

“Рио Тинто” групп болон Монголын Засгийн газар Оюутолгойн төслийн 4.2 тэрбум ам.долларын өргөтгөлийн төслийн хувь заяаг санхүүжүүлэгчдээс дахин шинэчлэн тогтоосон хугацаанд багтаан шийдэж чадаагүй нь “Рио Тинто”-гийн зэсийн бизнесээс олох орлогын хэтийн төлөв байдалд эргэлзээ төрүүлэхэд хүргэлээ.

“Рио Тинто”-гийн Канад дахь салбар болох “Turquoise Hill Resources” компанийн мэдээлэлд дурдсанаар, зээл олгогчдын төслийг санхүүжүүлэх үүрэгт хугацаа есдүгээр сарын 30-нд дуусчээ. Оюутолгойн төслийг санхүүжүүлэх үүргээ сунгахыг зээлдэгчдээс албан ёсоор хүсээгүй хэдий ч тэд нартай яриа хэлэлцээ үргэлжилж байгаа аж.

Сиднейд төвтэй “CLSA Asia-Pacific Markets” компанийн шинжээч Д.Рэдклифф, “Төмрийн хүдрийн орлого буурах тусам үүнийгээс “Рио Тинто” бусад үйл ажиллагаанаасаа нөхөх шаардлагатай. Гэхдээ тус компани зэсийн бизнестээ хэт их ач холбогдол өгөн Оютолгойг өргөжүүлэхийг зорьж байгаад болгоомжтой хандаж байна” гэжээ.

Оюутолгойд гүнийн уурхайг хөгжүүлэх төсөл нь Монгол дахь хамгийн том хөрөнгө оруулалт болох байсан ч “Рио Тинто” болон тус улсын Засгийн газрын татварын хэмжээ, зардлын өсөлт зэрэг олон асуудалтай маргаанаас үүдэн 18 гаруй сар хойшлоход хүрсэн юм. 2013 онд тус “Рио Тинто”-гийн нийт орлогынхоо 11 хувийг зэсийн олборлолтоос хангасан бөгөөд энэ нь төмрийн хүдэр, хөнгөн цагааны олборлолтынх нь дараа орох үзүүлэлт ажээ.

Уг нь Хятадын хилээс 80 км зайд орших Оюутолгой бүрэн хүчин чадлаараа ажиллаж эхэлбэл Монголын эдийн засгийн гуравны нэгийг дангаараа ханган дэлхийн гуравдахь том зэсийн уурхай болох учиртай.

Гүний уурхайг санхүүжүүлэхэд 15 банк нэгдсэн ч дээр дурдсан маргаанаас үүдэн санхүүжилтийн хугацааг гурван удаа хойшлуулахад хүрсэн билээ.

Д.Рэклиффийн үзэж буйгаар, Оюутолгойг өргөжүүлж чадахгүйд хүрвэл уг уурхайн 4.96 тэрбум ам.долларын балансын үнэлгээгээ бууруулахад хүрэх юм. Шинжээч цааш нь ярихдаа, “Рио Тинто” ингэхийг хүсэхгүй. Юу гэвэл тус компани 2011 онд 3.9 тэрбум ам.долларын үнэлгээтэй байсан Мозамбик дахь нүүрсний уурхайн активаа өнгөрсөн долдугаар сард 50 сая ам.доллараар худалдаад байна” гэсэн билээ.

Б.Барс /ЗУУНЫ МЭДЭЭ/