Төмрийн хүдрийн баяжуулах үйлдвэр ашиглалтад орлоо

“Фокус метал майнинг” компанийн Булган аймгийн Бүрэгхангай сумын нутаг дахь Худагбайшинтын төмрийн хүдрийн ордын нойтон баяжуулах үйлдвэр өнгөрсөн бямба гаригт нээлтээ хийжээ.

Үйлдвэрийн нээлтэд Уул уурхайн сайд Д.Ганхуяг болон албаны хүмүүс оролцсон байна. Салбарын сайд энэ үеэр “Булган аймагт Монгол Улсын анхны төмрийн хүдрийн нойтон баяжуулах үйлдвэрийн эхний ээлжийг хүлээн авлаа. Сүүлийн жилүүдэд төмрийн хүдрийн олборлолт болон экспорт өсөн нэмэгдэж байгаа.

Баяжмалын хэмжээ ч дагаад өсөж байгаа. Иймд төмөрлөгийн салбараа тодорхой үе шаттайгаар хөгжүүлэх шаардлагатай байна. Эхний ээлжинд хүдрээ олборлоно, баяжуулна. Улмаар техникийн хүчин чадлаа сайжруулна. Ингэснээр металлургийн үйлдвэрлэл барихад шилжих алхам хийгдэх юм.

Өнгөрсөн 10 жилийн хугацаанд металлургийн өмнөх үе шатыг түлхүү анхаарч байсан. Харин одоо металлургийн салбарыг хөгжүүлэх цаг нь болсон” хэмээжээ. Худаг байшинт уурхай 2012- 2014 онуудад 20 сая ам.долларын хөрөнгө оруулалтаар нойтон баяжуулах үйлдвэрийн барилга угсралтын ажлыг хийжээ. Уг үйлдвэр ашиглалтад орсноор 100 гаруй ажлын байр шинээр бий болох аж.

Тус үйлдвэр жилд 600 мянган тонн хүдэр олборлож, 300 мянган тонн баяжмал гаргана. Энэ баяжуулах үйлдвэрийг ашиглалтад оруулснаар таван жилийн хугацаанд 1.9 сая тонн нойтон баяжмал, 69 мянган тонн хуурай баяжмал борлуулж 228.2 сая ам.долларын ашигтай ажиллана гэсэн тооцоо гаргажээ.

Э.Өнөр

Зууны мэдээ