Ц.Мөнхбаяр алт олборлогч компани руу дахин буудлаа
“Нутаг чөлөөлөх” аянд мордсон “Гал үндэстэн”-ийхэн алт олборлогч компани руу бууджээ. Тодруулбал, тус холбооныхон Өвөрхангай аймгийн Зүүнбаян-Улаан, Уянга сумын зааг дахь Ар уст гэдэг газарт алт олборлодог “Гурван тамга” компанид энэ сарын 21-ний өдөр шаардлага хүргүүлжээ. Тэд тус компанийнхнаас үйл ажиллагаагаа хоёр цагийн дотор зогсоож, нөхөн сэргээлт хийхийг шаардсан байна. Гэвч “Гурван тамга” компанийнхан шаардлагын хариуг өгөөгүй гэнэ. Тиймээс “Гал үндэстэн” холбооны тэргүүн Ц.Мөнхбаяр, Удирдах зөвлөлийн гишүүн Ц.Энхбаяр, Г.Баатархуяг, Н.Найманжин нар дээрх компанийн усан буу руу бууджээ. Эд зүйл рүүгээ буудуулсан компани Эрүүгийн цагдаагийн газарт гомдол гаргасан байна. Гомдлын дагуу Эрүүгийн цагдаагийн газраас ажлын хэсэг Өвөрхангай аймагт очиж буун дуу гаргасан тэмцэгчдийг баривчилж нийслэлд авчирчээ.
Энэ талаар “Гал үндэстэн” холбооноос өчигдөр хэвлэлийн бага хурал зарлав. Хуралд “Гал үндэстэн”-ийхнээс гадна “Амлалт нэхэх ард түмний холбоо”-ны удирдах зөвлөлийн гишүүн Г.Уянга, “Эх орон, тусгаар тогтнол, шударга ёс” хөдөлгөөний төлөөлөгчид оролцсон юм. Тэд нутаг чөлөөлөх аянд мордсон тэмцэгчдийг баривчилсныг эсэргүүцэж байгаагаа хэлээд Цагдаагийн ерөнхий газарт шаардлага хүргүүлж байгаагаа мэдэгдлээ. “Гал үндэстэн” холбооны зохицуулагч Н.Цэрэнгээс зарим зүйлийг тодрууллаа.
-Баривчлагдсан хүмүүсийг одоо хаана хорьж байгаа юм бол?
-Өчигдөр шөнө нийслэлд авчирсан гэх мэдээлэл байна. Угаасаа Өвөрхангай аймгийн Засаг дарга “Та нартай хамтарч ажилламаар байна. Ирж уулзаач” гэж хуурч ажил дээрээ ирүүлж байгаад бариулсан байна лээ. Тиймээс бид цагдаагийн байгууллагад хууль бус баривчилгаагаа зогсоохыг шаардсан бичиг хүргүүлнэ. Манай хөдөлгөөний гишүүд одоо хаана хоригдож байгааг мэдэхгүй. Баривчилгаа нийслэлд ч үргэлжилж байна.
-Улаанбаатарт байсан танай гишүүдийг бас баривчилсан юм уу?
-Манай Удирдах зөвлөлийн гишүүн Г.Болдбаатарыг өнөө өглөө гэрээсээ гарч байхад нь баривчилж хорьсон. Одоо хаана байгааг нь мэдэхгүй байна. Бид байгаль орчноо хамгаалахын тулд бүх аргаар тэмцлээ. Шаардлагатай бол цаашид ч тэмцсээр байх болно.
-”Гурван тамга” компани та нарын шаардлагыг хүлээж аваагүй учраас л галт зэвсэг хэрэглэсэн юм уу. Буудалгүй учраа ололцож болоогүй гэж үү?
-Тус компани “Урт нэртэй” хуульд хамрагдаж байгаа. Гэсэн ч өнөөг хүртэл алт олборлосон хэвээр байна. Тиймээс л хуулийн дагуу үйл ажиллагаагаа зогсоохыг шаардсан. Гэвч бидэнтэй зүй бус харьцаж, шаардлагыг тоогоогүй. Тиймээс арга буюу усан бууны насос руу нь буудсан байгаа. Түүнээс бид хүн рүү буу шагайгаагүй гэв.
Б.ЦЭЦЭГДЭЛГЭР
Т.ДААРИЙМАА
URL:
