“Рио Тинто”-гийн зургаан тэрбумын төсөл татварын маргаанаас болж гацсаар байна

Австралийн “Sydney Morning Herald” сонинд ийм гарчигтай нийтлэл гарчээ.

“Рио Тинто” компани, Монголын Засгийн газар хоорондын маргаан шийдэгдэлгүй удаж Оюутолгойн уурхайн ирээдүй хэрхэх нь тодорхойгүй хэвээр байна.

“Рио Тинто”-гийн амбицтай энэ төслийн олборлолт хэдийнэ эхэлсэн ч Монголын Засгийн газартай хэд хэдэн асуудлаар санал зөрөлдсөөр ирсэн билээ.

Аварга том зэс, алтны энэ уурхайд хөгжиж буй Монгол Улсын эзлэх хувь хэд байх тухай маргалдсаар байгаа юм. Үүний сацуу талууд Оюутолгойн уурхай 127 сая ам.долларын татвар төлөх эсэх, уурхайн тэлэлтийг хаанаас хэрхэн санхүүжүүлэх зэрэг олон асуудлаар хараахан тохиролцож чадаагүй байгаа билээ.

Энэ бүхнээс үүдэн Оюутолгойн зургаан тэрбум ам.долларын өртөгтэй хоёр дахь шатны гүний уурхайн бүтээн байгуулалтын ажил гацаанд орсон юм. Уг нь гүний уурхай ил уурхайгаасаа илүү их үр ашигтай ажээ.

“Рио Тинто” компанийн тус уурхайг хариуцдаг “Turquoise Hill Resources” компанийн гүйцэтгэх захирал К.Пристли мэдэгдэхдээ, “Оюутолгойн төслийг царцааж буй гол хүчин зүйл бол Монголд төлөх ёстой гэх татварын асуудал. Энэхүү гайхамшигтай их баялгийн хэм хэмжээг хэн хүнгүй хүлээн зөвшөөрдөг. Энэ орд газартай холбоотой үл ойлголцлыг арилгахын тулд бид бололцоотой бүхнийг хийж байна” гэжээ.

Оюутолгойн гүний уурхайг санхүүжүүлэх сонирхолтой дэлхийн томоохон 15 банк “Рио Тинто”-гоос Монголын Засгийн газартай тохиролцоонд хүрч төслийг цааш үргэлжлүүлэх гарц нээхэд өгсөн сүүлийн хугацаа долоон долоо хоногийн дараагаар дуусах юм. Канадын зарим хөрөнгө оруулагчид К.Пристлигээс гүний уурхайг барих эсэх, эсвэл тэрхүү уурхайг Монголын тал тэр чигт нь эзэмшихээр болсон эсэх талаар асуужээ. Тэрээр, “Би Монголын Засгийн газрын нэрийн өмнөөс ярьж чадахгүй. Үүсэн бий болсон асуудлыг бид шийдэх тэл дээр гол анхаарлаа хандуулж байна. Хамгийн гол нь бид цаашдын хөрөнгө оруулалт хийхээсээ өмнө хөрөнгө оруулалтыг хамгаалах баталгаа бий болгохыг урьтал болгож байна” гэж хариулсан байна.

Б.Барс

Зууны мэдээ