Ниргэсэн хойно нь хашгирч суух гэж

Сүхбаатар, Хэнтий, Дорноговь аймгийн 13 суманд энэ хавар гарсан малын шүлхий өвчний золиос нь малчид болоод үлдсэн. Өнгөрсөн нэгдүгээр сард Сүхбаатар аймгаас улбаалж, Хэнтий, Дорноговь аймагт малын гоц халдарт шүлхийн өвчин гарахад доор, дээргүй сандралдаж, тус аймгууд руу хүний хөл гишгүүлэх нь байтугай машин, техник явуулахыг хориглосон. Харин энэ өвчний бууралтыг зогсоох ганц арга нь малыг шүлхий өвчний эсрэг вакцинд хамруулах байсан. Гэтэл яг хийдэг дээрээ тулахад вакцины нөөц байхгүй, чанарын хадгалалт, хугацаа хэтэрсэн гэдэг гомдол дагуулсан. Тиймээс энэ хариуцлагагүй үйлдлийг зогсоох нэрийдлээр Мал эмнэлгийн газрын ерөнхий эмчийг ажлаас нь халж оронд нь өөр хүн томилсон юм. Өөрөөр хэлбэл, бүхэл бүтэн гурван аймагт малын шүлхий өвчин дэгчихээд байхад вакцины нөөц байхгүй гэдгээр хоёр, гурван хүнийг ажлаас нь халж, сольсноор асуудал шийдэгдсэн үү гэвэл өрөөсгөл. Хэл ам дагуулан байж гаднаас оруулж ирсэн вакциныг нь хоёр ч удаа малдаа хийлгэснээс болж малчид төлөө бүрэн авч чадаагүй явдал бий. Нөгөөтэйгүүр малын шүлхий өвчин дахин гарлаа гэж муугаар бодоход вакциныхаа нөөцийг бүрдүүлж чадсан уу гэж Монгол Улсын Шадар сайд, Улсын Онцгой комиссын дарга Д.Тэрбишдагваас асуух хэрэгтэй биз. Учир нь тухайн үед нөөц бүрдүүлэх, дотооддоо вакцин үйлдвэрлэх зүйлийг холбогдох байгууллагаад ярьж байсан. Гэтэл өнөөдөр энэ асуудлыг шийдсэн зүйл алга л байна.

Харин шүлхий өвчний талаарх хэл ам намдаагүй шахуу байхад Завхан аймгийн Дөрвөлжин, Говь-Алтай аймгийн Хөхморьт, Булган аймгийн Хишиг-Өндөр сумын дөрөвдүгээр багийн Нарангийн гол, нийслэлийн Хан-Уул дүүргийн 13 дугаар хороонд боом өвчин гарч, хорио цээрийн дэглэм тогтоосон хэвээр байна. Тэр байтугай Булган аймгийн Хишиг-Өндөр суманд боомоор өвчилсөн малаас хүн халдварлаж, эмчилж буй тохиолдол бий. Өөрөөр хэлбэл, малын гаралтай өвчнийг бууруулах талаар дорвитой ажил хийж чадахгүйгээс шүлхий, боом байнга гарч байгааг үгүйсгэхгүй. Гэтэл Монгол Улсын Шадар сайд, Улсын Онцгой комиссын дарга Д.Тэрбишдагва өвчин гараад хүнд халдварласан хойно нь Мэргэжлийн хяналтын ерөнхий газрын дарга, улсын Ерөнхий байцаагч Д.Батмөнхийг дуудан уулзаж, үүрэгдэж суух гэж. Нэг ёсондоо ниргэсэн хойно нь хашгирна гэгчийг харуулж суух юм.

Монгол Улсын Шадар сайд Д.Тэрбишдагва хоёрхон хоногийн өмнө боом өвчний голомтыг устгах, урьдчилан сэргийлэх үүднээс улсын Ерөнхий байцаагчийн албан даалгавар гарган аймаг, нийслэл, дүүргийн Засаг дарга, тухайн орон нутаг дахь Мэргэжлийн хяналтын байгууллагын удирдлагуудад үүрэг өгөхийг чиглэл болгосон юм. Нөгөөтэйгүүр цаашид вакцины зайлшгүй нөөц бүрдүүлэх, ариутгалын бодисын чанарт анхаарах, хил дамнасан гоц халдварт, халдварт өвчнөөс урьдчилан сэргийлэх үүднээс  боомтуудад эрсдэлд суурилсан хяналт шалгалтыг эрчимжүүлэхийг үүргэдэв. Мөн зорчих хөдөлгөөн ихтэй боомтууд, тухайлбал Замын-Үүд, Дорнод аймгийн Өвдөг Баянхошуу боомтод халдваргүйжүүлэлтийн пунктыг яаралтай ашиглалтад оруулж түүнд хэрэглэх химийн бодис, нөөц, чанарт анхааруулж байгаа нь хэр оновчтой вэ. Уг нь энэ бүхнийг малын гаралтай өвчин гарахаас урьдчилан сэргийлж байнгын хяналт байлгаж сурмаарсан.