Ус төрөгчийн автомашины шинэ үе ирлээ

Нефтийн дангаар ноёрхол хэзээ болтол үргэлжлэх вэ? Энэ ноёрхол өнөөдөр, эсвэл ойрын хугацаанд төгсөхгүй байж болох ч энергийн өөр эх сурвалжийн технологи бидний амьдралд бодитоор нэвтэрч эхэлжээ.

Саяхан “Тоёота” компани 2015 онд ус төрөгчийн машинаа худалдаанд гаргана хэмээн зарлав. Энэ нь байгаль орчинд ээлтэй тээврийн хэрэгслийн салбарт гарсан асар том дэвшил юм. Тэгвэл, тус компаний өрсөлдөгч “Хонда” компани “Тоёото”-ийн дээрх автомашинаас илүү техник үзүүлэлттэй, илүү хямд автомашиныг худалдаанд гаргана хэмээн мэдэгдлээ.

Ус төрөгчийн автомашин нь устөрөгч хэрэглэн хөдөлгөх энергиэ гаргаж авдаг тээврийн хэрэгсэл юм. Бусад төрлийн тээврийн хэрэгслийг шатахуунаар, эсвэл цахилгаанаар цэнэглэдэг бол устөрөгчийн автомашин нь устөрөгчөөр цэнэглэх савтай бөгөөд устөрөгчийг тусгай камерт хүчилтөрөгчтэй урвалд оруулж, үр дүнд нь үүссэн цахилгаан энергиэр цахилгаан хөдөлгүүрээ ажиллуулдаг байна. Устөрөгч нь байгальд дангаараа ховор бөгөөд үүнийг метан болон бусад төрлийн түүхий эдээс ялгаж, хиймлээр гарган авдаг ажээ.

Хондагийн шинэ машины технологи ерөнхийдөө Тоёотагийнхтой ижил боловч хүрээлэн буй агаараас хүчил төрөгчөө авч, урвалд оруулан эрчим хүч гаргах устөрөгчийн түлшний системээрээ давуу ажээ. “Хонда” компани шинэ автомашинаа АНУ-д борлуулахаар анх төлөвлөж байсан боловч эхний ээлжинд Японд худалдахаар болжээ.

Ус төрөгчийн автомашинаас ялгарах хаягдал бодис нь хорт утаа бус, зөвхөн ус юм. Энэ төрлийн автомашин бусад цахилгаан машинтай харьцуулахад хоёр давуу талтай гэнэ. Юуны өмнө, эко цахилгаан машины зайг бүрэн цэнэглэхэд 20-30 минут зарцуулдаг бол ус төрөгчийн машины ус төрөгчийн савыг дүүргэхэд 3 минут хангалттай. Энэ нь бензинээр ажилладаг машины түлшний савыг дүүргэдэгтэй бараг ижил хугацаа юм. Ус төрөгчийн автомашинд үүнээс ч илүү нэг давуу чанар бий. Бүрэн цэнэгтэй цахилгаан машин нь дахин цэнэглэх хүртлээ 200 орчим км зогсолтгүй явдаг юм. Тэгвэл, ус төрөгчийн автомашиныг нэг удаа цэнэглээд 500 км давхих ажээ. Харин, “Хонда” компани ус төрөгчийн машинаа 800 км зогсолтгүй явах чадвахитай гэдгийг зарлав.

“Тоёота” компани 2015 онд үйлдвэрээс зах зээлд нийлүүлэх ус төрөгчийн машинаа 97,100 ам доллараар худалдах бол “Хонда” нь 69,000-78,000 ам доллар байх бололтой.

Хондагийн шинэ загвар

Тоёотагийн шинэ загвар