“Кожеговь” Сүхбаатарт ураны хайгуул эхлүүлжээ

“Кожеговь” компанийнхан Сүхбаатар аймгийн Онгон сумын нутаг Булштайн гол, Булшин толгой гэдэг газар ураны хайгуул эхлүүлэхээр очсон ч нутгийн иргэдийн эсэргүүцэлтэй тулгарсан мэдээлэл байна. Тус компанийн Дорноговь аймгийн Улаанбадрах суманд авсан зөвшөөрлийн хугацаа дуусах дөхсөн, тэгээд ч сүүлийн үед малчид, иргэний нийгмийн зүгээс тэмцэл хөдөлгөөн өрнүүлж байгаатай холбоотой дээрх нүүдлийг хийсэн байж болзошгүй гэнэ.

Сүхбаатар аймгийн 13 сумын 12 нь ураны зөвшөөрөлтэй. Тэр дотроо Дарьгангын байгалийн цогцолбор, Алтан-Овоо орчим цацраг идэвхт бодисын зөвшөөрлийг Хүйтэн уул нэрээр олгосон байдаг.

Нийт 20 гаруй зөвшөөрлөөс Францын “Арева”-ийн охин компани “Кожеговь” ХХК 16, ОХУ, АНУ, Монгол Улсын хөрөнгө оруулалттай “Гурвансайхан  ХХК”  хоёр, “Монгол Ураниум Ресурс” ХХК “Хүйтэн уул” нэрээр хоёр тусгай зөвшөөрлийг тус тус эзэмшиж, 2013-2014 онд уран боловсруулах үйлдвэр барих, мөн “Дарьганга-24” төсөл хэрэгжүүлэх гэрээ хийсэн байдаг юм.

Л.ХЭРЛЭН

Зууны мэдээ