“Лидерс” цэнгээний газрын хамгаалагчид сэтгүүлч, зураглаачийн биед халджээ

Энэ сарын 3-4-нд  шил­жих шөнө иргэдийн мэдээл­лийн мөрөөр  албан үүргээ гүйцэтгэж явсан “ТВ-8” телевизийн зураглаач П.Тулга, Б.Давааням, сэт­гүүлч Б.Мэндбаяр нарын биед халдсан ноцтой хэрэг гарчээ.

Тодруулбал Баянзүрх дүүргийн XIII хо­рооллын нутаг  дэвсгэрт  үйл    ажил­лагаа явуулдаг “Ли­дерс” шө­нийн цэнгээний газрын 10 гаруй хамгаалагч тус телевизийн сэтгүүлч зураг­лаачдын биед хүнд гэмтэл учруулж,   мэргэжлийн   ка­мер болон  бусад эд зүйлийг нь эвдэлжээ.

“Лидерс” шө­­нийн цэнгээний газар нь байнга цаг хэтрүүлэн ажил­лаж иргэдийн ам­галан тайван  байдлыг алдаг­дуул­даг уч­раас ийнхүү “ТВ-8” теле­визийн “Шөнийн толь”  нэвт­­рүүлгийн баг хамт олонд хандсан байна.

Болсон явдлыг сий­рүүлбэл, Энэ сарын 3-4-нд шилжих шөнө хэсэг оршин суугчид тус телевизийн ре­дакци  руу  утасдаж цаг хэт­рүүлэн ажилладаг шө­нийн цэнгээний газрыг сур­валжлан холбогдох албаны хүмүүсийн сонорт хүргэж  “арга хэмжээ авахуулж өгөөч” гэж хүссэн аж. Ингээд тус телевизийн багийг шөнийн 00:02 цагт  очиход “Лидерс” шө­нийн цэнгээний газарт 30 гаруй үйлчлүүлэгч  архи  согтруулах ундааны зүй­лээр үйлчлүүлэн сууж байжээ.

Тэднийг  тус газар руу нэвтэрч орох гэхэд нь 10 гаруй хамгаалаагч  гар гараасаа барилцан гинжин холбоо үүсгэж тэднийг түрж шахан авсан бичлэгийг нь булаах  гэж  нэлээд но­цолдсоны эцэст тэдний нэ­гийг нь чирж машинд суулган харанхуй байрны буланд аваачиж байгаад толгой түрүүгүй зоджээ.

Харин зарим үлдсэн хэдэн хамгаалагч нар нь зөөгч нартайгаа нийлж цэнгээний газарт  үлдсэн сэтгүүлчдийг бас л зодож гэмтээсэн байна.

Б.Мэндбаяр: Зурааглаач П.Тулгыг машинд чирч суулган харанхуй газар аваачин зодсон

Ингээд халдлагад өрт­сөн “ТВ-8”  телевизийн  “Шөнийн толь”  нэвт­рүүл­гийн сэтгүүлч Б.Мэнд­баяр “Зургаадугаар сарын 3-4-нд шилжих шөнө манай телевизийн 1900-1952 дугаарын утсанд ир­сэн мэдээллийн дагуу 13 дугаар хороололд байрлах “Лидерс” гэх шөнийн клубт үйл ажиллагааг нь  сур­валжлахаар очсон.

Ту­хайн  үед шөнийн 00:02 цаг өнгөрсөн байхад архи  согтууруулах ундаагаар чө­­­лөөтэй үйлчлээд 00:00-00:06 цаг  хүртэл архи сог­­туу­руулах ундаагаар үйлч­­лэхгүй гэсэн хуулийн заалтыг зөрчин ажиллаж байсан.   Мөн тэр  өдөр  мягмар  гараг байсан. Пүрэв, баа­сан, бямба гарагт тусгай үзүүлбэртэй бол шөнийн 00:03 цаг хүртэл архи сог­тууруулах ундаагаар үйлч­лэхгүйгээр сунгаж ажиллах эрх нь байдаг.

Гэтэл мягмар гарагт шөнийн 00:02 цаг хүртэл үйл ажиллагаагаа хууль зөрчин явуулж байсан. Бид тухайн үед дотогшоо дайрсаар байгаад орж дүрсээ авч чадсан юм. Гэтэл зөөгч  нартайгаа нийлсэн 10 гаруй бие  хамгаалагч бидэн рүү дайрч камер болон бусад эд зүйлсийг булаан авах гэж улайран дайрч эхэлсэн. Мэдээж бид тухайн үед ка­мераасаа бичсэн бичлэгийн хальсаа авч амжсан байсан.

Гэтэл  зураглаачийг   маань хамгаалагчид нь  ма­шинд чихэж аваад тус хо­рооллын нэгэн байрны гадаа аваа­чиж байгаад зодсон.  Уг нь бид нар хамгаалагч нартай зууралдаж байгаад зураглаачаа зугтаалгасан бо­ловч тэд хаалгаа түгжиж зу­рааглаачийг барьж ав­сан байсан.

Ийм асуудал үүссэн учраас бид Баянзүрх дүүргийн цагдаад дуудлага өгөхөд нэг л цагдаа ирсэн. Тухайн хорооны байцаагч нь бид нарыг “Та нар зохицоод өнгөрвөл яасан юм” гэсэн өнгө аястай үг хэлж байсан. Уг нь бид шүүх эмнэлгийн дүгнэлт энэ тэр гаргасан боловч цагдаагаас одоог хүртэл  хариу  өгөхгүй бай­гаад гайхаж байна.

Ин­гээд бид энэ үйл явдал болс­ны маргааш нь дахин нэвтрүүлэг бэлдэж тус дүүргийн Ху­далдаа үйлчил­гээний хэлт­сийн дарга Халиунаа гэх эмэгтэйгээс тодруулга авахад “Тус шөнийн цэн­гээ­ний газарт бид удаа дараа албан бичиг явуулж   эрхийг  нь   цуцлуулах хү­­сэлтэй байгаагаа Нийс­­лэ­лийн  худалдаа   үйлд­вэр­лэл үйлчилгээний  хэлтэст   явуул­сан.

Уг нь өнгөрсөн жил тус баарны үйл ажиллагааг зог­соож байсан боловч  өнгөр­сөн оны 12 дугаар сарын  31-нд тусгай зөвшөөрлийг нь буцаагаад олгочихсон байсан.  Мэдээж бид энэ тал дээр ажиллаж байгаа боловч ямар нэгэн байдлаар буцаагаад эрхээ сэргээлгээд авчихаад байна” гэж хэлж байсан нь өдгөө баримт болон үлдсэн.

“Шөнийн толь” нэвтрүүлгийн үйл ажиллагаа бол хууль бус үйлдлийг олон нийтэд шууд  ил болгодгоороо онцлогтой шүү дээ. Бидэнд маш их дарамт ирдэг. Тухайлбал биднийг нэвтрүүлэг  бэлдэх гээд гарах үед хөдөлгөөний нэр барьсан зарим нөхдүүд, мөн баар цэнгээний газрын эздийн  хамгаалагч  нар араас машинтай даган айл­гаж сүрдүүлж байдаг нь ч  нууц биш.

Яг  болсон  бодит  үйл явдлыг баримтаар  дүрс­жүүлэн авсан байхад Баян­­зүрх дүүргийн цаг­даа­гийнхан  хэргийг  ямар ша­танд явж байгаа талаар ч мэдээлэл өгөхгүй байна. Уг нь бид нар аль хэдийнэ шүүх эмнэлгийн дүгнэлтээ гар­гуулж гэмтлийн зэргээ тогтоолгосон байгаа шүү дээ.

Одоо  бидний хэргийг  шалгаж байгаа Цагдаагийн ахлах дэслэгч, мөрдөн бай­­­цаагч  Г.Баасанжав ямар ч хариу  өгөхгүйгээр өнөөд­­­­рийг хүрээд байна. Энэ хэрэг  явдлын  дараа “Лидерс” цэнгээний  газ­рын­­хан  хүнээр дамжуулж бид­нийг уулзъя, зохицъё  гэж хэлүүлэхдээ асуудлыг яаж шийдэх вэ гэдэг тал дээр юу ч ярихгүй байгаа нь харамсалтай байна.

Хэрэг явдал болсны маргааш нь л биднийг дуу­даж шүүх эмнэлгийн дүгнэлт гаргуулаад өнөөг хүртэл ямар ч мэдүүлэг аваагүй байна. Бид ажлаа хийж явсан сэтгүүлчид гэдгийг цагдаагийнхан ойл­­­гох хэрэгтэй. Та бүхэн санаж байгаа бол өнгөрсөн онд баар цэнгээний газраар шалгалт хийж явсан  цагдаа сэтгүүлчийг хамтад нь зод­сон хэрэг гарч байсан шүү дээ.

Юутай ч бид энэ хэр­гийг зүгээр өнгөөрөхгүй. Хамгийн гол  нь үнэ цэнэтэй мэргэжлийн   камераа эв­дүүлж өөрсдийн бие мах бодид  гэмтэл   учруулсанд гом­долтой байна. Тий­мээс эцсээ хүртэл явж сэт­гүүлч­дийнхээ эрх ашгийг хамгаална” гэж гэв.

Бид энэхүү шөнийн цэнгээний газрын эздийг нь ямар хүн байдаг талаар асууж сонирхоход эх сур­валжууд “Нэр төртэй нэг найруулагчийн эхнэрийн ажиллуулдаг баар гэсэн. Ер нь эздүүд нь өөрсдийгөө их л нууцладаг шүү дээ. Дотор нь ажиллаж байгаа хүмүүс ч жинхэнэ эзэн нь  ямар хүн байдгийг ч мэддэггүй  гэсэн.

Ер нь эдний ард маш том хүн байгаа болоод л өглөө хүртэл ажилладаг ганц газар болоод байна. Та нар судлаад яваад үзээрэй Нийслэлийн захирагчийн ажлын албаны худалдаа үйлдвэрлэл үйлчилгээний хэлтэс  тус цэнгээний газ­рын тусгай зөвшөөрлийг нь дандаа сунгаад өгдөг.

Энэ хавьд эднийхээс өөр ингэж ажиллах зориг зүрхтэй газар байхгүй” гэлээ.Юутай ч дээрх сэтгүүлч зураглаач нар болсон үйл явдлыг баримтжуулан авч цагдаагийн байгууллагад өгсөн байхад өнөөд­рийг  хүртэл эл хэр­гийн талаар яагаад нэг ч удаа бай­цаалт авахгүй байгаа нь хачир­халтай.

Уг нь хууль­даа 00:00 цагаас хойш архи, согтууруулах ундаа зарж болохгүй гээд цагаан дээр хараар дурайтал бичсэн байдаг шүү дээ.  Товчхондоо бол цаг­даа­гийн хурандаа нарын ивээлээр  04:00 цаг хүртэл ажилладаг газрууд хаа сайгүй бий.

Томхоноос нь дурьдвал Барилгачдын тал­байн «Доргио» шөнийн клуб 5000  төгрөгийн таксаар өглөөний 06:00 цаг хүргэдэг байх жишээтэй.  Тэдний нэг нь  сэтгүүлчдийн биед хал­даж ноцтой гэмтэл уч­руулаад байгаа «Лидерс» шөнийн клуб орно.

Мэдээж тус цэнгээний газар хэн нэгэн эрх мэдэлтний ач буянаар  ажиллаж байгаа нь бодит үнэн. Өөрөөр  хэлбэл   цагдаа­гийн  эрх мэдэл бүхий дарга нарын улаан цээжээрээ хамгаалдаг иймэрхүү газ­рууд дүүрэг бүрт бий .

Хамгийн сонирхолтой нь бусад шөнийн  клубыг  хавчин  хяхаж 23:50 цаг болов уу үгүй юу  баахан цагдаа  нар дайрч орж ирээд сүрийг үзүүлж байгаад  хаалгадаг нь бас л бодит зүйл. Гэтэл “Лидерс” шөнийн цэнгээний газрын тусгай зөвшөөрлийг цуцлах саналыг Улаанбаатар хо­тын захирагчийн албаны Худалдаа үйлдвэрлэл үйл­чилгээний хэлтэс рүү явуулсаар байхад яагаад тусгай зөвшөөрлийг буцаан сэргээдэг юм бэ гэж тус газраас асуумаар байна.

Дээрх балмад үйлдэлд цагдаагийн байгууллагаас эрүү  үүсгэн  шалгаж  эх­лэхийг нийт хэвлэл мэдээл­лийнхэн хүсч  байна.  Харин  Мон­голын Сэтгүүлчдийн эв­лэлээс уг хэргийг анхаа­ралдаа авч сэтгүүлчийн биед халдсан энэ мэт үйлдэл  сүүлийн үед их гарах болсон учраас хэргийг хуулийн дагуу шийдвэрлүүлж  сэт­гүүлч­дийн эрх ашгийг хам­гаалах болно гэдгийг хэлж байсан.

Юутай ч энэ он гарснаас хойш анх удаа ийнхүү сэт­гүүлч, зураглаачийн биед халдсан  анхны хэрэг гарлаа. Бид дараагийн дугаартаа хуулийг уландаа гишгэсэн “Лидерс” шөнийн цэнгээний газар нь хэн гэгч эрх мэдэлтний нөмөр нөөлөгт ийнхүү дураараа авирлаж байдгийг  сурвалжлан  хүр­гэх болно.

Р.Саруул

Эх сурвалж: